Botanıkalyq baqta sport kesheni salyna ma – Ekologııa mınıstrligi daýly suraqqa jaýap berdi
NUR-SULTAN. QazAqparat – QR Ekologııa, geologııa jáne tabıǵı resýrstar vıtse-mınıstri Erlan Nysanbaev elordada Botanıkalyq baq mańynda sport keshenin turǵyzý týraly daýly pikirlerge jaýap berdi, dep habarlaıdy QazAqparat tilshisi.
Onyń aıtýynsha, BAQ-ta habarlanǵan jańa sport kesheni botanıkalyq baq aýmaǵyna emes, onyń mańaıyndaǵy park aýmaǵyna salynady. Al park – elorda ákimshiligi quzyryndaǵy kommýnaldyq menshik.
«Jalpy botanıkalyq baqtar ǵylymı-zertteý jumystaryn júrgizip, jańa ósimdik túrlerin jersindirip, jergilikti aýa raıyna beıimdeý úshin qajet. Sol sebepti de Nur-Sultan qalasyndaǵy Botanıkalyq baq erekshe qorǵalatyn tabıǵı qoryq bolyp esepteledi. Syrttan alyp kelgen ósimdikterdi astananyń qolaısyz aýa raıynan, qysqy aıazynan qorǵaý úshin aınalasyn parkpen qorshaǵan edik. Bul bastamanyń basy-qasynda ózim de júrgenmin.
Búginde bul ýchaskede Soltústik Qazaqstanǵa, Shyǵys, Ońtústik, Batys Qazaqstanǵa jáne Soltústik Amerıkaǵa tán aǵashtar ektik. Munda tek qana ǵylymı-zertteý jumystary júrgiziledi jáne onyń aýmaǵynda eshqandaı nysan salynbaǵan», - dep atap ótti Erlan Nysanbaev QazAqparat tilshisine bergen suhbatynda.
Vıtse-mınıstrdiń aıtýynsha, botanıkalyq baq pen ony qorshaǵan park aýmaǵy jalpy 89,2 gektar jerdi alyp jatyr. Onyń ishinde 46,3 gektary ǵana mınıstrlik ókilettigine kiretin, erekshe qorǵaýdaǵy botanıkalyq baq bolyp esepteledi.
«Botanıkalyq baqtyń búgingi dúnıejúzilik tájirıbesine qarasaq, osydan 25-30 jyl buryn botanıkalyq baqta adam júrýge bolmaıdy degen uǵym bolatyn. Al qazir kóptegen elderde botanıkalyq baqtar halyqtyń demalatyn ornyna aınaldy. Árıne, kelýshiler de mádenıetti saqtap, erekshe qorǵalatynyn túsinip, qoqys tastamaýǵa, lastamaýǵa tyrysýy kerek. (...)
Naqty sport keshenin alsaq, ol botanıkalyq baq syrtyndaǵy, jergilikti organ balansyndaǵy parkte turǵyzylady. Park zonasynda halyqtyń demalys ınfraqurylymyn jasaýdy ákimdik sheshedi. Ol bizdiń mınıstrliktiń quzyrynda emes. Óz pikirim boıynsha, atalǵan orynǵa sporttyq keshendi salýǵa bolady. Ol botanıkalyq baqqa esh áser etpeıdi jáne zańǵa qaıshy emes. Al oıyn-saýyq ortalyqtary syndy iri nysandar salýǵa árıne, jol bermes edik», - dep túsindirdi vıtse-mınıstr.
Aıta keteıik, Nur-Sultanda Botanıkalyq baq mańynda sport ortalyǵy salynatyny habarlanǵan edi. Jeke ınvestıtsııa esebinen salynatyn sport kesheni turǵyndarǵa qoljetimdi bolady.
Qazirgi ýaqytta sýbsıdııa esebinen ınvestormen halyqtyń áleýmettik álsiz toptary qataryndaǵy adamdardyń sport ortalyǵyna barý múmkindigi talqylanýda.
