«BOTA» qorynyń bilim granttary baǵdarlamasy 2011-2012 oqý jylyna 300-den astam grant bóledi
ASTANA. 7 aqpan. QazAqparat - «BOTA» QQ-nyń Bilim granttary baǵdarlamasy 7 aqpannan bastap 2011-2012 oqý jylyna arnalǵan baıqaýdy ashyq dep jarııalaıdy.
Baıqaýlyq saýalnamalardy qabyldaý merzimi 8 aptany quraıdy jáne 2011 jyldyń 31 naýryzynda aıaqtalady. Baǵdarlamanyń nátıjesinde 300-den astam úmitker bilim grantynyń ıegeri atanady. Grant jyl saıyn uzartý múmkindigimen (4 jylǵa deıin) bir jylǵa beriledi. Grant jeńimpazdarynyń esimderi 2011 jyldyń tamyz aıynda belgili bolady, dep habarlady «BOTA» qorynyń Baılanys jáne damý departamentiniń mamany Móldir Bekjan.
«BOTA» qorynyń Bilim granttary baǵdarlamasy joǵary akademııalyq kórsetkishke ıe, biraq oqý aqysyn tóleýge múmkindigi joq jáne memlekettik grant boıynsha ótpegen áleýmettik jaǵdaıy tómen otbasylardaǵy jastarǵa Qazaqstannyń kez kelgen kolledjderi men JOO-da joǵary bilim alýǵa kómektesedi. Óz qyzmetiniń alǵashqy eki jylynda «BOTA» qory Bilim granttary baǵdarlamasy boıynsha baǵdarlamanyń akademııalyq jáne qarjy talaptaryna jaýap beretin 319 úmitkerge grant bóldi. Bilim granttary baǵdarlamasy boıynsha oqıtyn birqatar stýdentter kolledjde oqýǵa sheshim qabyldasa, ózgeleri Almaty qalasyndaǵy Qazaq Ulttyq ýnıversıteti jáne KIMEP, Astana qalasyndaǵy Eýrazııalyq Ulttyq ýnıversıteti, Qaraǵandy Memlekettik ýnıversıteti syndy beldi ýnıversıtetterdi tańdady.
Grant oqý ótemaqysymen qosa, panajaı, jol jáne kúndelikti shyǵyndardy jabatyn shákirtaqyny qamtıdy. Sonymen qatar, grant ıegerleri bir jyl ishinde olardyń sátti akademııalyq bastamalaryn qoldaýǵa baǵyttalǵan kásibı damý semınarlaryna qatysý múmkindigine ıe. Osy jyly «BOTA» qorynyń áleýmettik jaǵdaıy tómen otbasylardaǵy jastar men balalarǵa kómek kórsetý qyzmetimen úndes mamandyqtardy tańdaǵan úmitkerlerge grant berý týraly sheshim qabyldaý barysynda artyqshylyq beriledi.
Kelesi talapkerler baǵdarlamaǵa qatysýǵa quqyly: Kolledjge ne joǵary oqý ornyna birinshi ret tapsyryp jatqan, ne buǵan deıin qabyldanbaǵan 29 jasqa deıingi azamattar men 11-synyp oqýshylary nemese túlekteri. Joǵary oqý ornyna birinshi ret tapsyryp jatqan, ne buǵan deıin qabyldanbaǵan kolledjdiń sońǵy kýrsynyń stýdentteri nemese túlekteri. JOO-nyń stýdentteri baǵdarlamaǵa qatysa almaıdy.
Bilim granttary baǵdarlamasy ashyq baıqaý. Bul baıqaýǵa Qazaqstannyń kez kelgen aımaǵynan baǵdarlama talaptaryna jaýap beretin úmitkerler qatysa alady. Desek te, artyqshylyq tabys, tutyný jáne otbasy quramy kórsetkishteri negizinde áleýmettik jaǵdaıy asa aýyr otbasylardaǵy úmitkerlerge beriledi. Árıne, úmitkerler jaqsy oqı alatyn áleýetin kórsete alýlary kerek. Bilim granttary baǵdarlamasyna úmitkerlerdi tańdaý barysyna táýelsiz irikteý komıteti kómek kórsetedi.
