Bostonnyń bas ımamy Tamerlan Tsarnaevty ıslam dástúrleri boıynsha jerleýden bas tartty
ASTANA. 26 sáýir. QazAqparat - Bostonnyń bas ımamy Talal Eıd jergilikti marafon kezinde lańkestik jasady dep aıyptalyp otyrǵan Tamerlan Tsarnaevty ıslam dástúrleri boıynsha jerleýden bas tartty. Týystary ony jergilikti meshitterdiń birinde jerleýge jınaldy, biraq T.Eıd dinı qaýymmen keńeskennen keıin ǵana rásimdi ótkizý týraly sheshim qabyldaıtynyn málimdedi, dep habarlaıdy Ýtro.rý Huffington Post-qa silteme jasap.
Bir kún buryn dinbasy Tsarnaevty ıslam dástúrleri boıynsha jerlemeıtindigin qadap aıtqan bolatyn: "Bul adam sanaly túrde kinásiz adamdardy óltirgen. Osy áreketti jasaý arqyly ol ıslam jolynan taıyp ketti", - dedi T. Eıd.
Lańkestikke kúdiktiniń denesi týystaryna tapsyryldy, dep habarlaıdy NBC. Týystaryna rásimdi ótkizýden bas tartqan meshittiń aty atalmady, biraq Tsarnaevtyń týysy Patımat Tsarnaeva baýyrlarynyń «onda barǵanyn» atap ótti. T.Tsarnaevtyń denesin Daǵystanǵa jetkizýi múmkin ekendigi týraly másele áli talqylanýda.
Daily Mail-diń jazýynsha, eger anasy Zýbeıdat Tsarnaeva AQSh-qa keletin bolsa, ony qamaýǵa alýy múmkin. Ótken jyldyń qazan aıynda oǵan Lord& Taylor dúkeninen 1,6 myń $ somasyna kıim urlaǵany úshin aıyp taǵylǵan. Іs boıynsha tyńdaý 25 qazanǵa belgilengen, alaıda, Tsarnaeva sotqa kelmegendikten, ony qamaýǵa alý qaýpi tónip tur.
Sondaı-aq, Djohar Tsarnaevty ustaýdyń jáne odan suraq-jaýap alýdyń jańa jaı-japsary belgili boldy. Federaldyq tergeý bıýrosy agentterimen áńgimesinde ol lańkestik áreketti jasaǵannan keıin aǵasymen birge Nıý-Iorkke saýyq keshine barmaq bolǵanyn ózi habarlady. Sonymen qatar, polıtsııa derekterine súıengen Associated Press málimetteri boıynsha, Djohar Tsarnaevty ustaǵan kezde ol qarýsyz bolǵan. Agenttik, sondaı-aq, Bostonda jarylǵan bombalar radıomen basqarylǵandyǵyn anyqtady. Olardy uıaly telefon kómegimen iske keltirgen. Tamerlan jáne Djohar Tsarnaevtarǵa 15 sáýirde Boston marafonynyń máresinde lańkestik áreketti jasady dep aıyp taǵylyp otyr. Lańkestik saldarynan 180-nen astam adam jaraqat alyp, úsh adam qaza bolǵan edi. Suraq-jaýap kezinde kishi Tsarnaev lańkestik áreketti aǵasymen birge "Irakta jáne Aýǵanstandabolǵan soǵys úshin kek alý" retinde jasaǵanyn moıyndady.
