Bostondaǵy lańkestik is boıynsha qazaqstandyq stýdentterge aıǵaq-dálelderdi joıý arqyly tergeýge kedergi keltirdi degen qylmystyq aıyp taǵyldy
ASTANA. 2 mamyr. QazAqparat - Bostondaǵy lańkestik is boıynsha qazaqstandyq stýdentterdi sot tyńdaýy 14 mamyrda ótedi,
dep habarlady QR Syrtqy ister mınıstrliginiń baspasóz qyzmeti Tvıtterdegi paraqshasynda.
«Bostonda qazaqstandyq stýdentterge aıǵaq zattardyń kózi joıdy degen qylmystyq aıyp taǵyldy. Olar federaldy qylmystyq túrmege aýystyryldy. Atalǵan qylmystyq is boıynsha sottyq tyńdaý 14 mamyrǵa belgilenip otyr», - delingen QR SІM habarlamasynda.
Vedomstvonyń atap ótýinshe, 1 mamyr kúni tańerteń AQSh kóshi-qon zańnamasyn buzǵandary úshin qazaqstandyq stýdentter Dıas Qadyrbaev pen Azamat Tajaıaqovqa taǵylǵan aıyp boıynsha sot tyńdaýy bolyp ótti. Eki is boıynsha da tyńdaýlar kesh ýaqytqa aýystyryldy (A.Tajaıaqov - 9 mamyr, D.Qadyrbaev - 22 mamyr). Sol kúnniń ekinshi jartysynda olarǵa aıǵaq-dálelderdi joıý arqyly tergeýge kedergi keltirdi degen qylmystyq aıyp taǵyldy. Taǵylǵan aıyptardy eskere otyryp, olar federaldy qylmystyq túrmesine aýystyryldy. Bul qylmystyq is boıynsha tyńdaýlar 14 mamyrǵa bekitildi.
«Sonymen qatar, bizdiń azamattarymyzǵa Bostonda bolǵan jarylystardy uıymdastyrýǵa qatysty aıyp taǵylyp otyrǵan joq ekenin atap ótemiz. Olarǵa aıǵaqtardy joıdy degen aıyp taǵylýda. Qazirgi tańda bizdiń azamattarymyzǵa qajetti konsýldyq qoldaý kórsetilip jatyr. Olardyń kinási áli dáleldengen joq, tergeý jumystary júrgizilýde. D.Qadyrbaev pen A.Tajaıaqov tergeý organdaryna barynsha kómek kórsetýde. Biz osyǵan deıin birneshe ret aıtyp ótkendeı, Qazaqstan lańkestiktiń kez kelgen túrlerine qarsy. Qazaqstandyq tarap AQSh quqyq qorǵaý organdarymen osy isti tergeýde barynsha yntymaqtasýda», - delingen vedomstvo aqparatynda.
Eske sala keteıik, 2013 jyldyń 15 sáýirinde Boston marafonynda eki jarylys oryn alyp, saldarynan 3 adam ajal qushty, 200-ge jýyǵy japa shekti. Keıin polıtsııa lańkesti jasaǵan eki kúdiktiniń izine shyǵyp, olar AQSh-ta zańdy túrde turyp jatqan Soltústik Kavkazdyń týmasy aǵaly-inili Tamerlan men Djohar Tsarnaevtar bolyp shyqty. Tártip saqshylarymen qaqtyǵys barysynda T. Tsarnaev qaza boldy. Al 19 jastaǵy D. Tsarnaev kóp uzamaı qolǵa tústi. Eger onyń kinási dáleldense, ol ómir boıy abaqtyǵa toǵytylady nemese ólim jazasyna kesiledi.
