Bostonda qazaqstandyq stýdent Azamat Tájaıaqovtyń isi boıynsha sot otyrysynda eki jaqty pikirsaıys aıaqtaldy
ASTANA. QazAqparat - Amerıkanyń Boston (Massachýsets shtaty) qalasynda qazaqstandyq stýdent Azamat Tajaıaqovtyń isi boıynsha sot otyrysynda eki jaqtyń pikirsaıysy aıaqtaldy. Alqa bıler sheshim shyǵarý úshin ózge bólmege ketti. Sheshim beısenbi kúni belgili bolýy múmkin, dep habarlady ITAR-TASS.
Stýdenttiń advokattarynyń biri Mettıý Maıers Tajaıaqov basty aıyptalýshy Djohar Tsarnaevtyń jaqyn tanysy bolǵandyqtan AQSh bıliginiń qýdalaý obektisine aınalǵanyn atap ótti.
«Ol qylmysty jasaǵan adamnyń dosy, al terrorısttiń dosy bizdiń jaýymyz bolyp tabylady», - dedi qorǵaýshy. - Bul jerdegi áńgime qaýymdastyqty aıyptaý týrasynda bolyp otyr». Osyǵan baılanysty Maıers alqa bılerge jas jigitke ádiletsiz bolmaýyn surady.
Maıers sonymen birge qazaqstandyq stýdentterdi Tsarnaevtyń sómkesin oǵan kómektesý úshin laqtyryp jiberdi degen aıyptary negizsiz ekenin jetkizdi.
«Kolledjde oqıtyn jastar ózgeshe oılaıdy», - dep túsindirdi ol. Maıerstiń sózine qaraǵanda, stýdentter óz is áreketteriniń nátıjesi qandaı bolatynyn túsinbegen.
Qorǵaýshylar qazaqstandyq stýdentter Tsarnaevtyń bólmesine marıhýana úshin kirgenin atap ótti. Advokattardyń sózine qaraǵanda, qoqystan tabylǵan sómkeni Qadyrbaev laqtyrǵan, al Tajaıaqovtyń oǵan esh qatysy joq.
Aıyptaýshylar bolsa, Tajaıaqov pen Qadyrbaev tergeý amaldaryna keldergi keltirý úshin Tsarnaevtyń sómkesin laqtyryp jiberdi dep qaıtalady. Olardyń sózine qaraǵanda ádilettiliktiń oryn alýyna stýdentter kedergi jasaǵan. Eger stýdentter aıypty dep tanylsa 25 jylǵa deıin bas bostandyǵynan aıyrylýy múmkin.
Tajaıaqovtyń ákesi Ámir Ismaǵulov osyǵan deıin bergen suhbatynda AQSh-tyń bas prokýratýrasy kýágerlerge yqpal etýge umtylǵanyn aıtqan.
«Aıyptaýshylar jaǵynan shaqyrtylǵan kýágerlerdiń kóbine qatty qysym jasalyp, sondyqtan olar óz málimdemelerin ózgertip otyrǵan», - dedi Ismaǵulov. - Buǵan aldymen Federaldyq tergeý bıýrosynyń qyzmetkerleri qatysty. Prokýratýra olarǵa ne isteý kerek ekendigin aıtyp otyrǵan sııaqty».
Ismaǵulovtyń sózine qaraǵanda, amerıkalyq BAQ-ta bul faktiler kezdespegen.
«AQSh BAQ-y bul otyrysty obektıvti túrde jazyp jatqan joq», - dedi ol. - Amerıkalyqtar bizdiń paıdamyzǵa eshteńe jazyp jatqan joq. Olar aıyptaýshylar jaǵynan shyqqan kýágerlerdiń málimdemeleriniń ózgerip otyrǵanyna mán bermeıdi. Olar bizdiń jigitterdi basynan-aq 25 jylǵa sottaǵan sııaqty».
