Boston polıtsııasy: Djohar Tsarnaev - aýrýhanada
ASTANA. 21 sáýir. QazAqparat - Boston polıtsııasy osy qalada ótken marafon kezinde bolǵan jarylysty jasaýshy degen kúdikke ilingen Djohar Tsarnaev qamaýda otyrǵanyn málimdedi,
dep habarlaıdy «Azattyq».
20 sáýir kúni tań ata jetken habarlar boıynsha juma kúni kesh bata jergilikti polıtsııa Bostonnyń shetinde bolǵan az-kem atystan keıin 19 jastaǵy kúdiktini tirideı qolǵa túsirgen.
Boston polıtsııasy Twitter-de "Kúdiktini izdeý operatsııasy aıaqtaldy. Qaýip-qaterden adamyz. Ádilet ústemdik qurdy. Kúdikti - qamaýda" dep jazdy.
Keıbir málimetter boıynsha, kúdikti Ýotertaýn qalasyndaǵy bir úıdiń artqy aýlasynda turǵan qaıyqtyń ishinde jasyrynyp jatqan.
Úıdiń ıesi polıtsııaǵa áýeli qaıyqqa juqqan qandy, sosyn onyń ishinde jatqan kúdiktini kórgenin habarlaǵan.
Kúdiktiniń aǵasy Tamerlan Tsarnaev 18 sáýir kúni polıtsııamen bolǵan atys kezinde oqqa ushqan edi.
15 sáýir kúni marafon kezinde bolǵan jarylystan 3 adam ólip, 176 adam jaraqat alǵan.
Bul - 2011 jylǵy 11 qyrkúıekten beri AQSh-ta bolǵan alǵashqy iri terakt.
AQSh úkimetiniń ókili 2011 jyly belgisiz bir sheteldik úkimettiń ótinishi boıynsha FBR Tamerlan Tsarnaevpen sóıleskenin, biraq kúdikti eshteńe baıqamaǵanyn habarlady.
Aǵaıyndy Tsarnaevtar reseılik sheshender bolyp shyqty. Olardyń nemere aǵasy Rýslan Tsarnı eki jigittiń AQSh-ta sońǵy onshaqty jyl boıy turyp jatqanyn aıtqan.
