Boston áýejaıynda quny 200 mln. dollar turatyn «Arman laıneri» otqa orandy
ASTANA. 8 qańtar. QazAqparat - Amerıkandyq Boston qalasynyń áýejaıynda japondyq Japan Airlines áýekompanııasynyń eki motorly reaktıvti Boeing-787 Dreamliner jolaýshylar ushaǵy otqa orandy.
Órt ushaq jerge qonyp, jolaýshylar túskennen keıin bastaldy, dep habarlady Reuters agenttigine silteme jasaı otyryp RBK.
Anyqtalǵandaı, oqıǵanyń oryn alýyna qosymsha energetıkalyq jabdyq akkýmýlıatorynyń jarylysy sebep boldy.
Áýekompanııanyń baspasóz qyzmetinen habarlanǵandaı, tútin ushaqtyń kabınasynda emes, laınerdiń artqy jaǵynda tirkelgen, jolaýshylar úshin eshbir qaýip bolmaǵan. Bul oqıǵa boıynsha tekserý amaldary belgilendi.
Aıta keteıik, Boeing 787 Dreamliner ushaǵynyń birinshi ekzemplıary 2007 jyldyń shilde aıynda tanystyryldy, laınerdi qurastyrý baǵdarlamasynyń quny 32 mlrd. dollardy qurady. Ushaqtyń bir ekzemplıarynyń naryqtyq quny kem degende 200 mln. dollardy quraıdy.
