Bostandyqqa shyqqandardyń úshten biri qaıta qylmys jasaıdy - Qasymov
ASTANA. QazAqparat - Jyl saıyn Qazaqstan kolonııalarynan 10 myńnan astam adam bosatylady. Bul týraly búgin Parlament Májilisindegi Úkimet saǵatynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Penıtetsıarlyq probatsııaǵa toqtalatyn bolsaq, oǵan jazany óteý merzimi aıaqtalýyna bir jyl ýaqyty qalǵan sottalǵandar jatady. Mekemeniń ákimshiligi áleýmettik-quqyqtyq kómek kórsetý boıynsha arnaıy jeke baǵdarlamany qurady, naqty sottalǵan adammen tıisti jumysty bastaıdy, bosatylýǵa daıyndalady. Osy oraıda tárbıelik sharalar júrgizilip, quqyqtary men mindettemeleri túsindiriledi. Sonymen qatar týystyq jáne áleýmettik baılanystaryn qalpyna keltirý, áleýmettik qyzmetter alý qajettiligi týraly nıeti qaralady», - dedi mınıstr
Onyń aıtýynsha, bul turǵyda qamtylǵan máselelerdiń barlyǵy aldyn ala bekitilgen tártipte ákimdikterge, polıtsııaǵa jáne probatsııa qyzmetine habarlanady.
Osy baǵytta sharalar óte mańyzdy ekenine toqtalǵan Qasymov: «Jyl saıyn elimizde kolonııalardan 10 myńnan astam azamat bosatylady. Olardyń úshten birine jýyǵy bostandyqqa shyqqannan keıin qaıta qylmys jasaıdy»,-dedi.
Vedomstvo basshynyń sózine qaraǵanda, kolonııalarda sottalǵandardyń jalpy orta jáne kásibı bilim alýlary úshin barlyq qajetti jaǵdaılar jasalǵan. Mekemelerde 53 jalpy bilim beretin mektep jumys isteýdi. 47 kásibı kolledjdiń bazasynda 35 jumys mamandyqtary boıynsha oqytý júrgiziledi.
