Bostandyq aýdanynda bir emhana 80 myń adamǵa qyzmet kórsetse, Fınlıandııada muny 10 emhana atqarady - halyqaralyq konferentsııa
ALMATY. 20 shilde. QazAqparat - Densaýlyq saqtaý salasynda Qazaqstannyń da ózge elderge úlgi bola alatyn kórsetkishteri barshylyq.
Dúnıejúzilik reprodýktıvti medıtsına qaýymdastyǵynyń múshesi, bıologııa ǵylymdarynyń doktory Saltanat Baıqoshqarova búgin Almatyda ótip jatqan «Ómir sapasynyń qazaqstandyq úlgi-qalyby áleýmettik jańǵyrtýdyń basty baǵyty retinde» dep atalatyn IV Halyqaralyq ǵylymı-tájirıbelik konferentsııada osylaı aıtty.
«Halyqqa medıtsınalyq qyzmet kórsetýde Qazaqstannyń olqy túsetin tustarymen qatar, ózindik artyqshylyqtary da jetkilikti. Máselen bizde ýltradybystyq zertteýde keıbir synamalar 1 saǵatta alynatyn bolsa, Izraıl, Germanııa sııaqty memleketterde keıde 1 aptada ǵana daıyn bolady. Kóptegen elderde sondaı-aq, halyqtyń dárigerge qaralýǵa qoljetimdiligi bizden qıyndaý. Qazaqstanda mamandar tapshy bolsa da, naýqastardyń dárigerge qaralýǵa múmkindigi mol», - deıdi «Ekomed» medıtsınalyq ortalyǵynyń jetekshisi Saltanat Baıqoshqarova.
Onyń aıtýynsha, senim telefondaryna túsken shaǵymdarǵa qaraǵanda, densaýlyq saqtaý mekemelerinde mamandar tapshylyǵynan halyq kezek kútýge kóp ýaqyt jumsaıdy. Máselen Almaty qalasynyń Bostandyq aýdanyndaǵy bir emhana 80 myń adamǵa qyzmet kórsetedi. Al Fınlıandııada bul qyzmetti 10 emhana atqarady. Sondyqtan olar Densaýlyq saqtaý mınıstrligine naýqastyń dárigerge qaralýy ýaqytyn kóbeıtýdi usynyp otyr. Óıtkeni 10-15 mınýt syrqat adamnyń hal-jaǵdaıyn bilip, jan-jaqty em taǵaıyndaýǵa jetkiliksiz.
