Bostandyq aýdanynda 27 jekemenshik balabaqsha ashyldy

ALMATY. QazAqparat - Bostandyq aýdanynda 27 jekemenshik balabaqsha ashyldy. Bul týraly Bostandyq aýdanynyń ákimi Altaı Rahymbetov halyqpen esepti kezdesýinde aıtty, dep habarlaıdy QazAqparat tilshisi.

«Aýdanda 29 memlekettik jáne 89 jekemenshik balabaqsha jumys isteıdi. Jalpy Almatyda balabaqsha jasyndaǵy 10595 búldirshin bar. 3 jastan 6 jasqa deıingi 2 936 bala kezek kútip tur. Memlekettik-jekeshelik áriptestik aıasynda balabaqshalarǵa kezekti qysqartý úshin byltyr 27 jekemenshik balabaqsha ashyldy», - dedi Altaı Rahymbetov.

Onyń aıtýynsha, jalpy orta bilim berý júıesine 56 uıym kiredi. Bostandyq aýdanynda 42 935 oqýshy bar bolsa, mektepterdiń qýaty 25 873 shamasynda bolyp tur. Oqýshylar oryndarynyń tapshylyǵyn qysqartý úshin mektepterdiń negizgi ǵımarattaryna qosymsha qurylys salý boıynsha birqatar is-sharalar júrgizilip jatyr. 1200 oryndyq №125 jalpy bilim beretin mektepte seısmıkalyq kúsheıtý jumystary aıaqtaldy. 1100 oryndyq №40 mektepke jáne sóıleý qabileti nashar balalarǵa arnalǵan №9 mamandandyrylǵan (túzetý) mektep-ınternatyna kúrdeli jóndeý júrgizilip jatyr.

№ 21 gımnazııa aýmaǵynda №189 balabaqshanyń qurylysy aıaqtalyp qaldy.

Sondaı-aq, «Asyltaý Taý» turǵyn úı kesheniniń aýmaǵynda áleýmettik jaýapkershilik sheńberinde 195 oryndyq №191 balabaqshanyń qurylysy aıaqtaldy.

«Oqýshylar ornynyń tapshylyǵyn azaıtý úshin byltyr №105 mektepke qosymsha ǵımarat salyndy. Qazir osyndaı japsarlas ǵımarattyń qurylysy № 140 mektepte de júrgizilip jatyr. Kezekte №65 mektep tur. Bul ár bilim shańyraǵyna qosymsha 300 oqýshy ornalastyrýǵa múmkindik beredi», - dedi Altaı Rahymbetov.

Sondaı-aq byltyr №38 jáne №60 gımnazııaǵa qosymsha ǵımarat qurylysyna jobalyq smetalyq qujatta ázirlengen.