Bostandyǵymyz ben táýelsizdigimizdi baǵalaı bilýimiz kerek, al jastar ardagerlerge árqashan qamqor bolýy qajet - N. Nazarbaev

ASTANA. 9 mamyr. QazAqparat - Búgin Memleket basshysy Nursultan Nazarbaev Astanadaǵy «Otan qorǵaýshylar» monýmentine gúl shoqtaryn qoıý rásimine qatysyp, Uly Otan soǵysy jyldarynda qaza tapqan jaýynger qazaqstandyqtardy bir mınýt únsizdikpen eske aldy.

Bul týraly QR Prezıdentiniń baspasóz qyzmetinen habarlandy.

Rásimge qatysqan resmı delegatsııa quramynda Uly Otan soǵysynyń ardagerleri, ortalyq memlekettik organdardyń, dıplomatııalyq korpýstardyń, «Nur Otan» HDP ókilderi jáne elorda jurtshylyǵy boldy. Buǵan qosa, qaza tapqan maıdangerlerge osy aıtýly kúni qurmet kórsetý úshin myńdaǵan qala turǵyndary keldi.

Rásimniń resmı bólimi aıaqtalǵannan keıin QR Respýblıkalyq ulanynyń úrmeli aspaptar orkestri Qazaqstan Respýblıkasynyń Ánuranyn oryndady. Osydan soń Qurmetti qaraýyl rotasy Qazaqstan Respýblıkasy Qarýly Kúshteriniń Joǵarǵy Bas qolbasshysynyń jáne Uly Otan soǵysynyń ardagerleriniń aldynda saltanatpen sap túzep júrip ótti.

Odan keıin Memleket basshysy shatyrly qalashyqqa kelip, ardagerlermen áńgimelesip, olardy Jeńis kúnimen quttyqtady.

Qazaqstan Prezıdenti ýaqyt ótken saıyn Uly Jeńistiń qadir-qasıeti arta túsetinin atap ótti.

«Bul surapyl soǵysqa 1 mln. 800 myń qazaqstandyq attanyp, sonyń teń jartysy maıdannan qaıtpady. Sondyqtan qazaqstandyqtardyń birneshe urpaǵy bul jeńisti árdaıym este saqtaıtyn bolady. Ardagerler aramyzdan barǵan saıyn azaıyp barady, sondyqtan da olardy qurmettep, qadirin jaqsy túsinýimiz kerek. Olar erlik, tatýlyq, birlik kórsetti jáne búgingi kún kóptegen urpaq úshin aqıqat kúni bolyp tabylady. Óıtkeni osy jeńisti jaqyndatý úshin atalary men ájeleri, ákeleri men analary maıdanda soǵysty jáne tylda eńbek etti», - dedi Memleket basshysy.

Nursultan Nazarbaev Jeńis kúniniń halyqtyń birligin, tynyshtyǵyn, turaqtylyǵyn bildiretin sımvoldyq máni baryn, bul elimizdiń eń basty jetistigi ekenin atap kórsetti.

«Bizdiń azamattarymyz soǵys otynan mert bolmaýy úshin qamqor bolý qajet. Búginde, ókinishke qaraı, «ystyq núktelerden» jetken aqparattyq málimetterdi dál bir maıdan dalasynan jetkendeı estımiz. Elimizde Táýelsizdik jyldary boıy beıbitshilik, dostyq jáne kelisim oryn alýda. Muny saqtaýymyz kerek jáne ony ótken soǵys tájirıbesi kórsetip otyr. Biz beıbitshiliktiń qunyn tereń túsinýge tıispiz. Eger bizdiń babalarymyz sol kezde jeńiske qol jetkizbegen bolsa, biz búgingi táýelsizdikti kórer me edik, kórmes pe edik. Bostandyǵymyz ben táýelsizdigimizdi baǵalaı bilýimiz kerek, al jastar ardagerlerge árqashan qamqor bolýy qajet. Óz kezeginde, memleket te olarǵa jan-jaqty kómek kórsetedi jáne ony odan ári jalǵastyra beredi», - dedi Nursultan Nazarbaev.

Memleket basshysy ár otbasyndaǵy ardagerlerge amandyq-saýlyq, sondaı-aq zor densaýlyq tileı kele, olarmen Uly Jeńistiń 70 jyldyǵyn birge atap ótetinine senim bildirdi.

Búginde Astanada 291 ardager, sonyń ishinde - 215 qatysýshy, 76 Uly Otan soǵysynyń múgedegi tirkelgen.