Bostandyqqa shyqqan 50-den astam adam májbúrli hımııalyq kastratsııadan ótedi

ASTANA. KAZINFORM – Densaýlyq saqtaý mınıstrliginiń deregine sáıkes, sońǵy 2 jylda, naqty aıtqanda 2023 jyly – 40, al 2024 jyly 56 adamǵa hımııalyq kastratsııa taǵaıyndalǵan. Búginde hımııalyq kastratsııany 53 adam alady.

BIZDIÑ ORTA podkasynda dáriger-psıhıatr Tamara Nasyrova men Májilis depýtaty Magerram Magerramov Densaýlyq saqtaý mınıstrliginiń hımııalyq kastratsııany qoldanýǵa qatysty jańa bastamasyn talqylady.

Hımııalyq kastratsııaǵa eń kóp ushyraıtyn tulǵalar Aqmola, Qostanaı, Túrkistan oblystary men Shymkent qalasyndaǵy Qylmystyq-atqarý júıesiniń mekemelerinde jazasyn ótep jatyr.

Qazirgi ýaqytta Qazaqstanda hımııalyq kastratsııa sot úkimi zańdy kúshine engennen keıin júrgiziledi. Alaıda, Densaýlyq saqtaý mınıstrligi bul tártipke ózgerister engizýdi usynyp, hımııalyq kastratsııany sottalǵan adam bosatylýǵa jarty jyl qalǵanda bastaý kerek dep otyr. Tamara Nasyrova hımııalyq kastratsııany bosatylýǵa deıingi alty aıda júrgizý aǵymdaǵy tásilge qaraǵanda nelikten tıimdi ekenin túsindirdi.

- Birinshiden, bul kezeńde preparattyń terapevtik áserin baqylaýǵa bolady. Ekinshiden, preparattyń naýqastarǵa qanshalyqty tózimdi ekenin baǵalaýǵa múmkindik týady. Úshinshi krıterıı - quqyq buzǵan tulǵany ambýlatorııalyq-polıklınıkalyq kómek júıesine, ıaǵnı tirkelgen jeri boıynsha densaýlyq saqtaý júıesine birtindep berý, - dedi Tamara Nasyrova.

Sarapshynyń aıtýynsha, bul sharanyń aldyn alý maqsaty da bar. Ol bosap shyqqannan keıin qylmys jasaý qaýpin tómendetýge kómektesedi jáne áleýmettik beıimdelýdi qamtamasyz etedi. Mundaı sharalar qoǵamda retsıdıv táýekelin azaıtady.

Podkastyń tolyq nusqasyn 22 tamyz kúni saǵat 00:30-da «Jibek Joly» telearnasynan kórýge bolady.

Eske sala ketsek, Іshki ister mınıstrliginiń pedofılderdi ómir boıy baqylaýǵa alý jospary baryn habarlaǵan edik.

Aıta keteıik, elimizde pedofılderge túrmeden shyqqanǵa deıin kastratsııa jasalmaq.