Bosnııada basyna oq tıgen qaqpashy oıyndy jalǵastyrǵan
ASTANA. 21 maýsym. QazAqparat - Bosnııada áýesqoılardyń fýtbol týrnıri barysynda komandalardyń biriniń qaqpashysynyń basyna oq tıgen.
24sata.hr habarlaýynsha, 51 jastaǵy qaqpashy Dýshko Krtalıtsa oq tıgenin baıqamaı oıyndy ary qaraı jalǵastyrǵan. Degenmen, oıyn barysynda basynyń aýyra bastaǵanyna qaramastan qaqpaǵa tek 1 gol jibergen ol matchtyń sońyna deıin shydaǵan. Oıyn aıaqtalǵannan keıin basynyń aýyrǵany údeı túsýmen qatar, sol jaq qoly jansyzdanǵan Krtalıtsa dáriger kómegine júginýge májbúr boldy. Shuǵyl arada aýrýhanaǵa jetkizilgennen keıingi rentgendik tekserý barysynda basynan oq tabylyp, alyndy.
Oıyn bolyp jatqan kezde kórshi aýylda úsh úılený toıy qatar ótip, qonaqtar úzdiksiz oq atqan kórinedi. Sondaı qańǵyǵan oqtardyń biri qaqpashyǵa tııýi múmkin degen joramal aıtylýda. Tipti, polıtsııa qyzmetkerleri abaısyzda Krtalıtsany atqan azamatty ustaǵan da kórinedi.
