Bosnııa jáne Gertsegovınada áskerı tikushaq apatynan tórt adam qaza tapty
ASTANA. KAZINFORM — Bosnııa jáne Gertsegovınada Eýropalyq odaqtyń «Alteıa» bitimgerlik mıssııasyna qatysqan ıtalııalyq áskerı tikushaq apatqa ushyrady. Saldarynan tórt adam qaza taýyp, taǵy 11 adam jaraqat aldy, dep habarlaıdy Kazinform agenttigi Euronews-ke silteme jasap.
Áýe apaty 29 qazanda Bosnııa jáne Gertsegovınanyń soltústigindegi Brchko qalasy mańynda boldy. CH-47 Chinook tikushaǵy Eýropalyq odaqtyń bitimgerlik kúshteri josparly oqý-jattyǵý ótkizip jatqan kezde qulaǵan.
Italııa Qorǵanys mınıstrliginiń málimetinshe, qaza tapqandardyń ekeýi — Italııa armııasynyń áskerı qyzmetshisi, qalǵan ekeýi — Italııa Qyzyl Krestiniń erikti áskerı korpýsynyń ókilderi.
Taǵy 11 adam jaraqat aldy. EUFOR mıssııasynyń málimetinshe, zardap shekkenderdiń jaǵdaıy turaqty. Olarǵa qajetti medıtsınalyq kómek kórsetilip jatyr.
Ázirge tikushaqtyń qulaý sebebi belgisiz. Oqıǵanyń mán-jaıy anyqtalyp jatyr.
Apat saldarynan beıbit turǵyndar zardap shekken joq. Sondaı-aq azamattyq ınfraqurylymǵa, múlik pen kólik quraldaryna zaqym kelgeni tirkelmegen.
EUFOR Althea bitimgerlik operatsııasy Bosnııa jáne Gertsegovınada 2004 jyldan beri júzege asyp keledi. Sol jyly Eýropalyq odaq kúshteri 1992–1995 jyldardaǵy soǵys aıaqtalǵannan keıin elde ornalasqan NATO kontıngentiniń ornyn basty.
Mıssııanyń negizgi mindeti — eldegi qaýipsizdik pen turaqtylyqty saqtaý, sondaı-aq beıbit kelisimderdiń oryndalýyna járdemdesý.
Buǵan deıin 2026 jylǵy 23 naýryzda Parsy shyǵanaǵynda Qatardyń áskerı tikushaǵy apatqa ushyraǵany habarlaǵan edik. Saldarynan jeti adam, onyń ishinde Qatardyń tórt áskerı qyzmetshisi men Túrkııanyń úsh azamaty qaza tapty. Qatar Qorǵanys mınıstrliginiń málimetinshe, apatqa josparly oqý-jattyǵý ushýy kezinde bolǵan tehnıkalyq aqaý sebep bolǵan.
