Bosnııa jáne Gertsegovına elshisi senim gramotasynyń kóshirmesin tabystady
ASTANA. KAZINFORM — Taraptar ózara qyzyǵýshylyq týdyratyn barlyq salalar boıynsha baılanystardy jalǵastyrýǵa kelisti, dep habarlaıdy Syrtqy ister mınıstrliginiń baspasóz qyzmeti.
QR Syrtqy ister mınıstriniń orynbasary Arman Isetov Bosnııa jáne Gertsegovınanyń Qazaqstanǵa jańadan taǵaıyndalǵan elshisi qyzmetin qosa atqarýshysy Ivan Orlıchten senim gramotasynyń kóshirmesin qabyldady.
A.Isetov Bosnııa jáne Gertsogovına dıplomatyn taǵaıyndalýymen quttyqtap, onyń qyzmeti eki el arasyndaǵy dostyq qarym-qatynastardy damytýǵa yqpal etetinine senim bildirdi.
— Kezdesý barysynda taraptar saıası, ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń qazirgi jaǵdaıy men damý keleshegin talqylady. Elshi I.Orlıch jyly qabyldaý úshin alǵysyn bildirip, Astana men Saraevo arasyndaǵy qarym-qatynastardy damytý úshin kúsh-jigerin jumsaýǵa ázirligin rastady, — delingen habarlamada.
Buǵan deıin Qasym-Jomart Toqaev birqatar memlekettiń elshilerinen senim gramotalaryn qabyldaǵanyn jazǵan edik.
