Bosnııa jáne Gertsegovına eliniń joǵary ókili Krıstıan Shmıdt otstavkaǵa ketti
ASTANA. KAZINFORM — Halyqaralyq qaýymdastyqtyń Bosnııa jáne Gertsegovınadaǵy joǵary ókili Krıstıan Shmıdt otstavkaǵa ketti, biraq ol murageri taǵaıyndalǵanǵa deıin qyzmetin jalǵastyrady, dep habarlaıdy TASS.
Oslobodenje basylymynyń habarlaýynsha, Krıstıan Shmıdt Bosnııa jáne Gertsegovınadaǵy joǵary ókil laýazymynan ketý týraly ótinishin joldaǵan. Degenmen, ol jańa kandıdat tańdalǵanǵa deıin óz qyzmetin jalǵastyratynyn atap ótti.
Shmıdttiń pikirinshe, Bosnııa jáne Gertsegovına «negizgi reformalardy áli júzege asyrǵan joq», sondyqtan joǵary ókil apparatynyń qyzmeti «óte mańyzdy» bolyp qala beretinin aıtylǵan. Qazirgi ýaqytta ol Nıý-Iorkte eldegi jaǵdaıǵa qatysty BUU-ǵa esep daıyndap jatyr.
Deıton kelisimi aıasynda qabyldanǵan konstıtýtsııa boıynsha Bosnııa jáne Gertsegovına eki sýbektige bólinedi — Bosnııa jáne Gertsegovına Federatsııasy jáne Serb Respýblıkasy, sondaı-aq Brchko aýdany bar. Ókimet júıesinde úsh negizgi etnıkalyq top usynylǵan: boshnıaktar, serbter jáne horvattar.
El negizinen BUU Qaýipsizdik Keńesiniń maquldaýynan keıin Bosnııa jáne Gertsegovına Beıbitshilikti júzege asyrý keńesiniń Basqarýshy komıtetimen taǵaıyndalatyn halyqaralyq qaýymdastyqtyń joǵary ókili (Deıton kelisimine sáıkes qurylǵan laýazym) arqyly basqarylady. Alaıda 2021 jyldyń mamyr aıynda Basqarýshy komıtet elderiniń elshileri BUU Qaýipsizdik Keńesiniń ruqsatynsyz Shmıdtti jańa joǵarǵy ókil etip taǵaıyndaý týraly sheshim qabyldady. Sondyqtan Serb Respýblıkasynyń basshylyǵy Shmıdttiń zańdylyǵyn moıyndamaıdy.
Buǵan deıin Danııanyń premer-mınıstri Mette Frederıksen otstavkaǵa ketken edi.
