Bosnııa men Gertsegovınada qarttar úıi órtenip, 11 adam qaza boldy

ASTANA. KAZINFORM – Bosnııa men Gertsegovınanyń Týzla qalasynda qarttar úıinen órt shyǵyp, 11 adam qaza boldy, 38 adam jaraqat aldy, dep habarlaıdy Anadoly.

BAQ-tyń habarlaýynsha, órt Týzla qalasyndaǵy qarttar úıiniń birinde keshke bolǵan.

Órtti sóndirýge órt sóndirýshilerden bólek Srebrenık, Jıvınıtse, Lýkavats pen Kalesııa qalalarynan brıgadalar tartyldy.

Týzla kantonasynyń bas prokýrory Vedran Alıdjanovıch jýrnalısterge órt saldarynan 11 adam qaza bolyp, jaraqat alǵan 38 adamnyń aýrýhanaǵa jetkizilgenin aıtty.

Onyń sózinshe, zardap shekken 4 adamnyń jaǵdaıy aýyr.

- Órt týraly alǵashqy habar keshkisin saǵat 20:45-ti tústi. Oqıǵa ornyna órt sóndirýshiler, polıtsııa men jedel járdem brıgadasy jiberildi,- dedi Alıdjanovıch.

Sondaı-aq ol órttiń ózdiginen tura almaıtyn adamdar jatqan qabattan shyqqanyn, óz kezeginde bul jaǵdaı adamdardy evakýatsııalaýdy qıyndatqanyn jetkizdi.

- Kýágerler qoıý tútinniń tez tarap ketkenin jáne jarylystardyń dybysy shyqqanyn, al adamdar dúrlikkenin aıtty. Órttiń naqty neden shyqqany ázirge belgisiz. Qazir ony sarapshylar naqtylap jatyr. Tergeý barysynda bári anyqtalady,-dedi prokýror.

Al qarttar úıiniń dırektory Mırsad Bakalovıch óziniń otstavkaǵa ketetinin málimdedi.

Osyǵan deıin Meksıkada dúkende bolǵan órtten 22 adam kóz jumǵany týraly jazdyq.