Bosnııa men Gertsegovınada ózender arnasynan asyp jatyr
ASTANA. 6 jeltoqsan. QazAqparat - Shelektep quıǵan nóser jańbyr saldarynan Eýropa jáne Latyn Amerıkasyndaǵy birneshe elde sý tasqyny boldy, dep habarlaıdy Ýtro.rý agenttigi.
Portýgalııada ondaǵan eldi mekender sý astynda qaldy, álemge áıgili Madeıra aralyna jol múldem jabylǵan. Aerovokzaldar men teńiz porttary tabıǵattyń tosyn minezinen bolǵan kedergilermen kúresýde. Fýnshala áýejaıynda ondaǵan adam ushý kezegin kútip otyr. Bosnııa men Gertsegovınada ózender arnasynan asyp jatyr. Sý tasqyny týraly eldiń soltústiginde de aqparat taraǵan. Týzla qalasyndaǵy bir úı sanaýly sekýndtardyń ishinde sý astynda qalǵan. Kórshiler otaǵasyn ǵana qutqaryp qala alǵan, al onyń barlyq týǵandary qaza tapty.
Bolgarııada da dabyl qaǵylýda. Sofııaǵa jaqyn jerdegi joldardy sý shaıyp ketken. Birneshe júrgizýshi iz-tússiz joǵalǵandar qatarynda. Jańbyrdyń jaýýy birtindep azaıǵanymen, ózenderdegi sý mólsheri áli de joǵary qalpynda.
Latyn Amerıkasynda sý tasqyny zardabyn joıý sharalary júrip jatyr. Sý tasqyny ondaǵan úıdi basyp qalǵan Kolýmbııanyń soltústik-shyǵysynda izdestirý jumystary júrgizilýde. Bul eldegi jańbyr maýsymy eki júzge tarta adamnyń ómirin alyp ketken. Kolýmbııa prezıdentiniń aıtýynsha, el óte qıyn jaǵdaıdy bastan keshirýde.
