Bosqyndardy jarylqamas buryn, sheteldegi qazaqtardyń jaǵdaıyn jaqsartyp alý kerek - B. Tileýhan

ASTANA. Qarashanyń 11-i. QazAqparat /Qanat Mámetqazyuly/  - Úkimet bosqyndardy jarylqamas buryn, sheteldegi qazaqtardyń jaǵdaıyn jaqsartyp, olardy elge kóshirip alý kerek edi. Búgin  Parlament Májilisiniń jalpy otyrysynda «Bosqyndar týraly» zań jobasyn talqylaý barysynda depýtat Bekbolat Tileýhan osyndaı pikir bildirdi,

dep habarlaıdy QazAqparat.

«Bosqyndar týraly» zań qabyldanǵannan keıin Qazaqstanǵa qaraı jaqyn sheteldegi «bosqyn» aǵyla túsedi degen úlken qaýip bar. Olar kele-kele ulttyq sany artyp, bizdiń elimizden ózderiniń ulttyq-mádenı ortalyǵyn ashqysy, tilin damytqysy keletini túsinikti jaıt. Al búgingi zań jobasy osylardyń barlyǵyna aıqara esik ashyp, taǵy da qushaǵymyzdy keńinen jaımaqpyz. Jalpy, óziniń otanyna opa bermegen adam, Qazaqstanǵa kelip neni jarylqamaqshy?», dep atap ótti B. Tileýhan. Onyń paıymdaýynsha, bundaı zańdy qabyldaý, ásirese Qytaıdyń keleshek jospary úshin ońtaıly bolýy múmkin.  Osyny alǵa tartqan depýtat Qazaqstanǵa keletin bosqyndardy jarylqamas buryn, aldymen elge keletin oralmandardyń jaǵdaıyn jasaý kerek edi degen oıyn ortaǵa saldy.  

«Búgingi kúni Ózbekstanda 2 mln. qazaq bar, Qytaıda 1,5-2 mln.-ǵa jýyq qazaq bar. Bosqyndardan buryn aldymen óziniń qazaqtyǵynan aıyrylyp qalýy múmkindigin bastan keshirip otyrǵan osy aǵaıyndardy nege elge ákelip almaımyz. Qytaıda batysty ıgerý degen baǵdarlama bar, bunyń negizgi saıasaty - barlyq ultty qytaılandyrý. Sondyqtan da, endigi 10-15 jylda kórshi elde tek qytaılanǵan qazaqtar qalýy múmkin. Al osy sheteldegi qazaqtardyń jaǵdaıyn kóre otyryp, basqa  bosqyndarǵa pana bolamyz deý úlken ábestik bolmaı ma?!», dedi B. Tileýhan.