«Bosqyndar týraly» jańa Zań aıasynda birqatar is-sharalar atqaryldy
ASTANA. Shildeniń 30-y. QazAqparat - Qazaqstanda «Bosqyndar týraly» Zań kúshine engen 2010 jyldyń qańtarynan bastap búgingi kúnge deıin Kóshi-qon komıtetiniń Almaty qalasy boıynsha departamentinde 114 otbasy (336 adam) tirkeýden ótti.
Bul týraly QR Eńbek jáne halyqty áleýmettik qorǵaý mınıstrliginen málim etti.
«Bosqyndar týraly» Zań kúshinen engennen bastap, QR Syrtqy ister mınıstrligi men QR-daǵy BUU Bosqyndar isi jónindegi Joǵary Komıssary basqarmasy (BJKB) arasyndaǵy kelisimge sáıkes, QR BUU BJKB-da tirkelgen baspana izdeýshi jáne mandattyq bosqyndar tizimi Kóshi-qon komıtetiniń Almaty qalasy boıynsha departamentiniń qaraýyna berildi. 2010 jyldyń mamyrynan Almaty qalalyq departamenti qujattardy tirkeýdi bastady.
Búgingi kúni QR BUU BJKB usynǵan tizimge sáıkes, barlyǵy 114 otbasy (336 adam) tirkeýden ótti. Onyń syrtynda Departamentke habarlaspaǵan, meken-jaılary osy kúnge deıin anyqtalmaǵan mandattyq bosqyn dárejesine ıe 10 otbasy (22 adam) jáne baspana izdeýshi 6 otbasy (10 adam) bar. Sonymen birge, Kóshi-qon departamentine óz erkimen habarlasqan 32 otbasyna (103 adam) bekitilgen zańdarǵa sáıkes kýálikter men Almaty qalasynda tirkelý úshin joldamalar berildi.
Sondaı-aq, aǵymdaǵy jyldyń ótken maýsym aıynda quqyq qorǵaý organdary ótkizgen «Mıgrant» is-sharasy barysynda 29 adam ustalyp, olardyń 28-i Departamentke baspana izdeýshiler retinde tirkeldi.
Eńbek mınıstrliginen málim etkendeı, ustalǵan adamdardyń mártebesin anyqtaý boıynsha sheshim qabyldaý jumystary áli aıaqtalǵan joq. «Ádil sheshim qabyldaý úshin Departament óz jumysyn BUU Bosqyndar isi jónindegi Joǵary Komıssary basqarmasymen tyǵyz baılanysta júrgizip otyr. Barlyq sheshimder halyqaralyq quqyq qorǵaý organdarynyń formatyna sáıkes qabyldanatyn bolady», dep atap ótti mınıstrlikten.
Atalǵan jumystar barysynda qoldanystaǵy zańdylyqtardyń qatań saqtalýy, ásirese, Departamentke óz ótinishterimen habarlasqan jáne shet elderde qylmystyq is jasaǵany úshin quqyq qorǵaý organdarymen ustalǵan azamattardyń quqyqtarynyń qorǵalýyna, olarǵa zorlyq kórsetpeýge basty nazar aýdarylýda. QR BUU BJKB men azamattardyń quqyǵyn qorǵaý bıýrosy ókilderinen qurylǵan kóshpeli komıssııanyń qorytyndysy boıynsha, Almaty qalasynyń UQK-niń ýaqytsha tergeý oryndarynda otyrǵan azamattardyń jaǵdaıy qanaǵattanarlyq, olardan eshqandaı shaǵymy joq. Ótinishterdiń qaralýy BAQ jáne quqyq qoǵaý organdary úshin aıqyn, ári ashyq.
