Bosqyndar máselesi halyqaralyq talaptar negizinde sheshildi - Eńbek jáne halyqty áleýmettik qorǵaý mınıstrligi
ASTANA. Qazannyń 22-si. QazAqparat - Qazaqstan Respýblıkasynyń memlekettik organdaryna ártúrli halyqaralyq qoǵamdyq uıymdardan, jýrnalısterden jáne jeke tulǵalardan Ózbekstan Respýblıkasynyń Bas prokýratýrasynyń ótinimimen ústimizdegi jyldyń 9-12 maýsym aralyǵynda Almaty qalasynda qamaýǵa alynǵan 30 mandattyq bosqyndar men baspana izdeýshiler jóninde ótinishter men suranystar túsýde.
Eńbek jáne halyqty áleýmettik qorǵaý mınıstrliginiń málimetterine qaraǵanda, qamaýǵa alynǵan 30 bosqynnyń 29-y Qazaqstan Respýblıkasy Eńbek jáne halyqty áleýmettik qorǵaý mınıstrligi Kóshi-qon Komıtetiniń Almaty qalasy boıynsha departamentine Qazaqstan Respýblıkasynda bosqyn mártebesin alý úshin ótinish bildirgender. Olardyń berilgen ótinishteri qyrkúıek aıynda qaralyp, sheshim qabyldanǵan. Bosqyn mártebesin berý jónindegi komıssııanyń quramyndaǵy memlekettik organdardyń ókilderinen basqa, Jeneva, Shveıtsarııa, BUU Bosqyndar isi jónindegi Joǵary Komıssary basqarmalarynyń sarapshylary da qamaýǵa alynǵandardyń ótinishterimen muqııat tanysyp shyqqan.
Qazaqstan Respýblıkasyndaǵy BUU Bosqyndar isi jónindegi Joǵary Komıssary basqarmasynyń ókilderi qamaýǵa alynǵandardan suhbat alý sharasyna qatysyp, komıssııanyń qabyldanǵan barlyq sheshimderimen jáne málimetterimen tanysyp otyrdy jáne ókilderdiń pikirleri men usynystary komıssııa músheleri tarapynan eskerildi.
Ótinishter QR «Bosqyndar týraly» zańǵa jáne halyqaralyq zańdar jáne 1951 jylǵy Konventsııa talaptaryna saı aıqyn, eshbir bógetsiz qaralǵan. Qamaýǵa alynǵandar jóninde júrgizilgen barlyq komıssııa otyrystaryn adam quqyǵyn qorǵaý bóliminiń zańgeri qadaǵalap otyrdy. Komıssııa otyrysynyń jumysyna qamaýǵa alynǵandardyń eshbir narzylyǵy bolmaǵan jáne shaǵym-aryzdar da túspegen.
Bosqyn mártebesin berý jónindegi komıssııa jumysynyń qorytyndysy boıynsha, 1951 jylǵy qabyldanǵan Konventsııanyń F(e) pýnktine sáıkes burynǵy berilgen mandattyq bosqyndar mártebesi joıylyp, 28 ótinish berýshilerge baspana berýden bas tartyldy. Sonymen qatar, 1 Ózbekstan azamaty bosqyn dep tanylyp qamaýdan bosatyldy. Al 1 azamat qyrkúıektiń 8-inde Ózbekstan Respýblıkasyna qaıtaryldy. BUU Bosqyndar isi jónindegi Joǵary Komıssary basqarmasy bul azamatqa burynǵy berilgen bosqyn mártebesiniń kúshin joıdy, sondaı-aq Kóshi-qon Komıtetiniń Almaty qalasy boıynsha Departamentine ótinish bildirýden bas tartty.
Esterińizge sala keteıik, bosqyn mártebesin berýden bas tartylǵan azamattar QR «Bosqyndar týraly» Zańyna sáıkes, komıssııanyń qabyldaǵan sheshimine narazy bolsa joǵarǵy organdarǵa, sot júıesine shaǵymdanýǵa quqyly. Qamaýǵa alynǵandarǵa qorǵaýshylar qyzmeti usynylady. Óz elderinde aýyr qylmys jasaǵandary úshin jaýapqa tartylǵan azamattardyń Qazaqstanda bolýy memlekettik komıssııanyń sheshimi kúshine engennen keıin, QR-nyń barlyq zań talaptary boıynsha qaralatyn bolady.
