Bosfordaǵy jarys kezinde joǵalǵan reseılik sportshy áli tabylǵan joq
ASTANA. KAZINFORM — Túrkııada Bosfordy júzip ótpek bolǵan reseılik júzýshini izdestirý jumystary jalǵasyp jatyr, dep habarlaıdy Anadoly.
Ystanbuldyń Beıkoz aýdandyq prokýratýrasy Bosfor arqyly júzý kezinde joǵalyp ketken reseılik sportshyny izdestirý úshin arnaıy tergeý tobyn qurýdy tapsyrdy.
Quqyq qorǵaý organdary sportshynyń sýǵa batyp ketpegen bolýy múmkin degen nusqany da qarastyryp otyr. Osyǵan baılanysty jaǵalaý boıyndaǵy memlekettik mekemelerdiń, qonaqúılerdiń, dámhanalar men meıramhanalardyń, saıabaqtar men ózge de nysandardyń beınebaqylaý kameralarynyń jazbalary suratylǵan.
Prokýratýranyń tergeý qorytyndysy boıynsha, oqıǵa bolǵan kúni jergilikti ýaqytpen 10:08-de júzýshiniń qurylǵysynan sońǵy belgi sekirý alańynan tirkelgen. Biraq máre syzyǵyna jetkeni týraly eshqandaı sıgnal bolmaǵan.
Eske salaıyq, 24 tamyz kúni Ystanbulda ótken qurlyqaralyq júzý jarysynda 29 jastaǵy reseılik Nıkolaı Svechnıkov joǵalyp ketti. Ol jyl saıyn ótetin «Bosfor 2025» sporttyq sharasyna qatysyp, máre syzyǵyna jete almaǵan.
Bosfor buǵazy arqyly ótetin bul jarysqa álemniń 81 elinen 2820 sportshy qatysqan.
Reseılik sportshynyń márege jetpegeni belgili bolǵan sátten bastap teńiz polıtsııasy men jaǵalaý kúzeti izdestirý operatsııasyn bastaǵan. Qutqarýshylar Kanlydja–Kýrýcheshme arasyndaǵy júzý baǵyty men Ystanbul buǵazy boıynda izdeý jumystaryn jalǵastyryp jatyr.
Aıta keteıik, buǵan deıin estonııalyq azamat Túrkııada Bosfor buǵazy arqyly arqanmen júrip ótkeni anyqtaldy.