Bosańsýǵa áli erte - almatylyq dáriger koronavırýs taralýy jaıly

ALMATY. QazAqparat - Qazaqstannyń barlyq aımaǵynda koronavırýs boıynsha epıdemıologııalyq jaǵdaıdyń jaqsarǵany baıqalady, alaıda bosańsýǵa áli erte. Almatydaǵy №36 qalalyq emhananyń dáriger-epıdemıology Qarlyǵash Qaıyrbekova ekpeniń mańyzdylyǵyn túsindirip, ınfektsııadan qorǵanýdyń qarapaıym erejelerin taǵy bir eske saldy, dep habarlaıdy QazAqparat tilshisi.

Onyń aıtýynsha, elimizde sonyń ishinde Almatyda qazirgi ýaqytta koronavırýs indetin juqtyrǵandar sany azaıdy. Alaıda vırýs óte qaýipti bolǵandyqtan mýtatsııaǵa ushyrap, jańa shtamdardyń paıda bolýyna áser etýi ábden múmkin. Sondyqtan sanıtarlyq talaptardy tolyqqandy oryndaǵan durys. Koronavırýsqa qarsy ekpe alýdy toqtaýǵa bolmaıdy.

«Búgingi tańda Qazaqstanda «QazVac», «Vero cell», «Komırnatı» (Pfizer) vaktsınalary tirkelgen. Olar aýrýǵa qarsy turyp, ımmýnıtetti kúsheıtedi. Sondyqtan turǵyndarǵa ekpe men revaktsınatsııany jalǵastyrý usynylady.

Revaktsınatsııa – vaktsınadan keıin ımmýnıtetti kóterý maqsatynda jasalatyn shara. Vırýs túriniń mýtatsııalyq qabiletin eskere otyryp, vırýstyń pandemııalyq dárejedegi aldyn alý sharalarynyń eń negizgi jáne mańyzdy sheshimi dep oılaımyn. Aǵzanyń ózindik ımmýnıteti arqyly vırýsty tolyqqandy jeńýi úshin jasalady. Aıta keteıik, revaktsınatsııany alǵashqy vaktsınanyń tolyq 2 komponentin alǵan soń, 6-9 aıdan keıin alý kerek», - deıdi dáriger.

Sonymen qatar, ol ınfektsııanyń aldyn alý úshin adam kóp jınalatyn jerlerden aýlaq bolýǵa keńes berdi.

«Adamdar kóp jınalatyn jerlerge meıilinshe barmaǵan jón. Maska taǵyp, quramynda kem degende 70 paıyz spırt bar antıseptıkti qoldaný kerek. Jemis- jıdekti ystyq sýmen jýý qajet. Sportpen shuǵyldanýdy ádetke aınaldyrǵan durys. Kúndelikti paıdalanyp júrgen as máziri aqýyzdarǵa, dárýmender men mıneraldarǵa baı bolǵany abzal. Osynyń bári aýrýdyń aldyn alýǵa jáne tez saýyǵyp ketýge kómektesedi», - deıdi Qarlyǵash Qaıyrbekova.

Spıker koronavırýs aýamen taraıtynyn taǵy eske saldy

«Koronavırýs pandemııasy bastalǵaly maska kúndelikti ómirimizdiń ajyramas bóligine aınaldy. Robert Koh atyndaǵy ınstıtýt taratqan málimetke sáıkes, indet adamnan adamǵa jótelý nemese túshkirý nátıjesinde aýa-tamshyly jolmen, sondaı-aq janasý arqyly beriledi. Sondyqtan maska eń mańyzdy saqtyq sharalarynyń biri. Qazaqstannyń barlyq aımaǵynda koronavırýs boıynsha epıdemıologııalyq jaǵdaıdyń jaqsarǵany baıqalady. Alaıda bosańsýǵa áli erte»,- dedi dáriger.