Bosanǵannan keıingi tekserý nege mańyzdy – dáriger keńesi
ASTANA. KAZINFORM – Bosaný – áıel aǵzasy úshin úlken synaq. Sábı aman-esen dúnıege kelse de, anaǵa mindetti túrde dárigerlik tekserýden ótý kerek. Bul týraly Almaty qalalyq №4 perzenthana dırektorynyń orynbasary, akýsher-gınekolog Ekaterına Samartseva aıtyp berdi.
Onyń sózinshe, áıel balany toǵyz aı kóterip, bosaný kezinde kóp kúsh jumsaıdy. Sondyqtan aǵzaǵa qaıta qalpyna kelý qajet.
– Kóptegen áıelder «aman-esen bosandym, endi bári artta qaldy» dep oılaıdy. Biraq aǵzadaǵy keıbir ózgerister baıqalmaı, jasyryn júrýi múmkin. Sol sebepti ýaqtyly jasalǵan tolyq tekserý asqynýdyń aldyn alýǵa kómektesedi, – deıdi joǵary sanatty akýsher-gınekolog Ekaterına Samartseva.
Sol sebepti bosanǵannan keıin áıelge mindetti túrde tolyq tekserýden ótý qajet. Mamandar bosanǵannan keıingi tekseristi perzenthananyń ózinde jasaǵan durys dep esepteıdi. Sebebi ol jerde áıeldiń jaǵdaıyn biletin dárigerler bar, ári ana tanys ortada ózin jaıly sezinedi.
– Biz tek taldaý jasap qana qoımaı, áıeldiń tolyq qalpyna kelý protsesin de baqylap otyramyz. Tekseris barysynda qan aınalymy men qan túzý júıesi, baýyr men búırek jumysy, gormondar, zat almasý jáne kishi jambas aǵzalary tekseriledi. Gemoglobın deńgeıine, qabynýlarǵa qaraımyz, baýyr-búırektiń jaǵdaıyn anyqtaımyz, qajet bolsa ÝDZ jasaımyz. Bul tek jalpy densaýlyq úshin emes, áıeldiń bolashaqtaǵy bala kóterý qabiletine de mańyzdy. Bosanǵannan keıingi tekserý – kelesi júktilikke daıyndyqtyń alǵashqy qadamy. Eger áıel taǵy sábı josparlasa, aǵzasynyń tolyq qalpyna kelgenine kóz jetkizýi kerek. Bul asqynýlardan saqtap, júktiliktiń sátti ótýine kómektesedi, – dep túsindirdi Ekaterına Samartseva.
Qalalyq №4 perzenthanada jańa bosanǵan analarǵa jasalatyn keshendi tekserýge: jalpy qan taldaýy (gemoglobın, erıtrotsıtter, leıkotsıtter formýlasy, trombotsıtter, SOE, gematokrıt), jalpy zár taldaýy, bıohımııalyq zertteýler (ALT, AST, kreatının, glıýkoza, jalpy belok, jalpy bılırýbın, mochevına), bakterıoskopııalyq jaǵyndy, tamyrdan qan alý, kishi jambas aǵzalarynyń ÝDZ, gınekolog keńesi kiredi. Bul tekserýler áıeldiń jalpy densaýlyǵyna ǵana emes, bolashaqta qaıta júkti bolýyna da áser etedi.
Dárigerdiń bosanǵannan keıingi tekserýden ótýdiń eń qolaıly ýaqyty – alǵashqy 6–8 apta ekenin aıtty. Bul aǵza belsendi túrde qaıta qalpyna keletin kezeń, ony «altyn ýaqyt» dep te ataıdy.
–Eger shaǵymdar bolsa, etekkir buzylsa, aýyrsynýlar nemese basqa da ózgerister baıqalsa, kez kelgen ýaqytta tekserilgen durys. Eń bastysy – keıinge qaldyrmaý kerek, sebebi «aýyryp em izdegenshe, aýyrmaýdyń jolyn izdeý» jeńil. Bosaný – tek bastamasy ǵana. Reprodýktıvti densaýlyq sábı dúnıege kelgen sátpen shektelmeıdi. Áıeldiń reprodýktıvti densaýlyǵy árdaıym kútimdi qajet etedi. Densaýlyǵyńyzǵa nemquraıly qaramańyz, ol sábıdiń densaýlyǵymen birdeı mańyzdy, – dep qorytyndylady Samartseva.
Eske salaıyq, bala týǵanda beriletin járdemaqyny 2025 jyldyń basynan bastap elimizde 117 myń adam aldy.