Bosanǵanda qulatyp alǵan: Almaty oblysynda náreste ólimine baılanysty tekseris bastaldy
QONAEV. KAZINFORM — Almaty oblysy Qaskeleń qalasynda jańa týylǵan náreste shetinep ketti.
Bul týraly áleýmettik jeli qoldanýshysy jazdy. Onyń aıtýynsha, týysy bosanǵan soń, ony arba-kerýetpen emes, múgedekter arbasymen alyp júrgen. Sonyń saldarynan bala qulap ketken.
— Eń soraqysy, dárigerler sábıdi qutqarý nemese oǵan kómektesý úshin eshteńe istemegen. Olar balanyń jaǵdaıy jaqsy ekenin aıtyp, anasynyń qolyna ustata salǵan. Kelesi kúni bala emshek emýdi qoıyp, ázer tynys ala bastady, sodan keıin ony basqa aýrýhanaǵa ota jasaý úshin shuǵyl túrde aýystyrdy. Bala aman qalmady. Basqa aýrýhananyń dárigerleri bizge sábıdiń jaraqatpen túskenin aıtty. Al qazir perzenthana óz salǵyrttyǵy úshin jaýapkershilikten qashyp otyr, — dep jazdy Bıbinur.
Atalǵan jaǵdaıǵa baılanysty Qarasaı klınıkalyq kópsalaly ortalyq aýdandyq aýrýhanasy jaýap berdi. Mekeme jaýabyna sáıkes, bul oqıǵa boıynsha medıtsınalyq kómektiń kórsetilý sapasyna ishki aýdıt, sondaı-aq ótinishte kórsetilgen derekter boıynsha qyzmettik tekserý júrgizilip jatyr.
— Qorytyndy tujyrymdar ishki tergep-tekserý nátıjeleri, medıtsınalyq qujattamaǵa júrgizilgen saraptamalyq baǵalaý jáne ýákiletti saraptamalyq uıymdardyń qorytyndylary negizinde jasalatyn bolady. Barlyq tekserý is-sharalary aıaqtalyp, túpkilikti qorytyndylar alynǵannan keıin Qazaqstan Respýblıkasynyń qoldanystaǵy zańnamasyna sáıkes tıisti sharalar qabyldanady, — delingen málimdemede.
Eske salaıyq, Aqtóbede qoqystan tabylǵan náreste sábıler úıine aýystyryldy.
