Bosanǵan analardyń perzenthanada qaralý ýaqyty qysqartyldy
ASTANA. QazAqparat - Belgııada áıelder densaýlyǵyn qorǵaý salasynda mindetti medıtsınalyq kómek qarjysy kezekti ret qysqartyldy. Budan bylaı, bosanǵan áıelderdi tórt kúnnen artyq ustaǵan perzenthana qyzmetkerleri 200 myńnan 800 myń eýroǵa deıin aıyppul tóleýi múmkin, dep jazady 24.kz.
Jaǵymsyz jańalyqty estip, jańa týylǵan shaqalaqtary úshin shyryldaǵan analardyń ókpeleri qara qazandaı. Ázirge tek Flandrııada engizilip jatqan jańa zańnamalyq normaǵa sáıkes, bosanyp, sábıin baýyryna alǵan áıelder perzenthanada 96 saǵattan artyq qarala almaıdy. Tek densaýlyǵy syr bergenderi ǵana sál emdele turýǵa quqyly. Bıliktiń bul sheshimi Flamand gınekologtar qaýymdastyǵy men jas analardyń shamyna tıgen.
Jas analar endi tek shaqyrtýmen qyzmet etetin akýsherlerdiń kómegine júgine alady. Úıge oralǵan alǵashqy mezette ýchaskelik medbıke qaraılasady. Tek bul járdem de aıtarlyqtaı jarytymdy emes, aptasyna nebári 35 saǵat. Al otbasylyq ortalyq qyzmetkerlerin shaqyrtýshylardyń sany kúnnen-kúnge artyp keledi.
Aıta keterligi, bılik ókilderi arnaıy zań jobasyn ázirleý kezinde bul ózgeristerdiń sanaýly klınıkalarda tájirıbe retinde engiziletin aıtqan, alaıda is júzinde eldiń flamandtyq bóliginde zań tolyqtaı qoldanylýda. Áleýmettik saqtandyrý kompanııalary shaqyrtý boıynsha qyzmet etetin barlyq akýsherlerdiń tólemaqysyn óteı alatyndaryna shúbálanyp otyr.
