Bosaǵan oryndarǵa bilim berý granttary taǵaıyndaldy
ALMATY. 25 naýryz. QazAqparat /Áıgerim Ámir/ - Búgin Q.I.Sátbaev atyndaǵy QazUTÝ-dyń aqyly negizde oqıtyn stýdentteri bilim berý grantyna ıe boldy.
Ol Bilim jáne ǵylym mınıstri B.T.Jumaǵulovtyń tóraǵalyǵymen joǵary bilim alý úderisinde bosaǵan oryndarǵa bilim berý granttaryn taǵaıyndaý jónindegi Respýblıkalyq konkýrstyq komıssııanyń sheshimi boıynsha anyqtalyp otyr.
Bos bilim berý granttaryn taǵaıyndaý konkýrsyna jetpis joǵary oqý orny qatysqan. Olar 6-aýy - ulttyq, 1-eýi - halyqaralyq, 30-y - memlekettik, 12-si - aktsıonerlik, 21-i - jekemenshik joǵary oqý oryndary. Jalpy sany 11 615 stýdent ótinish bildirgen.
Konkýrstyq komıssııa otyrysynyń qorytyndysy boıynsha 2206 bilim berý granttary aqyly negizde oqıtyn stýdentterge taǵaıyndaldy. Sonyń 214 orny, ıaǵnı 10 paıyzy Q.I.Sátbaev atyndaǵy QazUTÝ-dyń stýdentterine berildi.
«Barlyq grant ıegerlerin, olardyń ata-analaryn osy qýanyshty sátterińizben quttyqtaımyn! Oqýda ozat bolýlaryńyzǵa tilektespin! Osynshama joǵary oqý oryndary arasynan 10 paıyzdyq kórsetkish ol jaqsy nátıje. Mundaı tabysqa jetý sebebimiz, ústimizdegi jyly tolyq tólemaqy bólimine BUT (ENT) qorytyndysy boıynsha úmitkerler 77 baldan joǵary nátıjelermen qabyldanǵan bolatyn. Osynshama stýdentterimiz qysqy sessııa qorytyndysy boıynsha oqý úlgerimi jaqsy bolǵandyqtan grant ıegerleri atandy. Aldaǵy kúnderi de senimdi aqtaıdy degen úmittemiz»,-dedi ýnıversıtet rektory J.Ádilov.
