Bosaǵan máslıhat depýtattarynyń ornyna úmitkerlerdiń úshten biri - oqytýshylar
Bul týraly búgin QR Ortalyq saılaý komıssııasynyń hatshysy Baqyt Meldeshov málim etti, dep habarlaıdy QazAqparat.
«Buǵan deıin habarlanǵandaı, bosaǵan depýtattyq mandattarǵa barlyǵy 101 úmitker usynyldy. Saılaý zańnamasyna sáıkes tıisti okrýgtik saılaý komıssııalary kandıdattardy tirkeýdi kelesideı qujattar usynylǵanda júzege asyrdy: nıeti týraly ótinish, ómirbaıandyq derekter, kandıdattyń jáne onyń jubaıynyń tabysy týraly jáne múlki týraly deklaratsııalardy tapsyrǵany týraly salyq organdarynyń anyqtamalary, kandıdattyń 114295 teńge mólsherinde saılaý jarnasyn engizgenin rastaıtyn qujat. Qoǵamdyq birlestikter usynǵan kandıdattar qosymsha qoǵamdyq birlestiktiń joǵarǵy organynyń tıisti saılaý okrýgi boıynsha kandıdatty usyný týraly otyrysynyń hattamasynan úzindisin osy qoǵamdyq birlestiktiń ádilet organdarynda tirkelgeni týraly qujattyń kóshirmesimen qosa usynýy tıis», - dedi ol.
OSK hatshysynyń aıtýynsha, okrýgtik saılaý komıssııalary máslıhattardyń shyǵyp qalǵan depýtattarynyń ornyna kandıdattar retinde barlyǵy 96 adamdy tirkedi. Osylaısha, qazirgi ýaqytta máslıhattardyń shyǵyp qalǵan depýtattarynyń ornyna saılaýda ortasha básekelestik bir bos depýtattyq mandatqa 3-ten asa úmitkerdi quraıdy. Tirkelgen kandıdattardyń kóbi er adamdar 79 nemese 82,3 paıyz. Áıelder 17 nemese 17,7 paıyz. 31-i - Qazaqstan Respýblıkasynyń saıası partııalarynyń músheleri, 48-i eshbir partııaǵa tirkelmegen, 17-si partııaǵa músheligin kórsetpegen. Ortasha jas - 41 jas. 83,3 paıyzynyń joǵary bilimi, 11,5 paıyzynyń arnaýly orta jáne 5,2 paıyzynyń orta bilimi bar. Bul rette, tirkelgen kandıdattardyń úshten biri mamandyǵy boıynsha oqytýshylar, 18,8 paıyzy - ınjenerler, 14,6 paıyzy - ekonomıster, 8,3 paıyzy - zańgerler, 6,2 paıyzy - dárigerler.
«Qazirgi ýaqytta kandıdattardyń úgit naýqany bastaldy, ol 28 qazanda 24 saǵatqa deıin sozylady. Daýys berý 2016 jylǵy 30 qazanda bolady. Osy sátte máslıhattardyń shyǵyp qalǵan depýtattarynyń ornyna saılaý naýqanyn ótkizýge baılanysty shaǵymdar men ótinishter Ortalyq saılaý komıssııasyna kelip túsken joq», - dedi Meldeshov.
