Bos jumys oryndar jónindegi aqparattyń qoljetimdiligi artady
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» Zańyn eki oqylymda qarap, qabyldady, dep habarlaıdy QazAqparat.
Parlament qabyldaǵan zań Elbasynyń qol qoıýyna joldanady.
«Memleket basshysynyń tapsyrmasyn oryndaý úshin zań jobasynda jumyspen qamtý ortalyqtaryn reformalaý jáne barlyq bos jumys oryndary men barsha eldi mekender boıynsha biryńǵaı onlaın alań qurý kózdelgen. Osy maqsatta eńbek naryǵynyń biryńǵaı aqparattyq bazasyn quraıtyn «Eńbek bırjasy» memlekettik ınternet resýrsyn qurý qarastyrylǵan. Bul tuǵyrnama halyqty jumysqa ornalastyrýǵa baǵyttalǵan. ıAǵnı jumys izdeýshiler men jumys berýshiler týraly aqparatty qamtıtyn onlaın alań bolady. Atalǵan zań jobasynda elektrondy eńbek bırjasy arqyly jumys berýshiler men jumyssyzdardyń halyqty jumyspen qamtý ortalyqtarymen baılanysy jáne jumyspen qamtýdyń jekeshe agenttikteri arasyndaǵy ózara qarym-qatynasy bekitilgen. Bul óz kezeginde halyqqa bos oryndar jónindegi aqparattyń qoljetimdiligin arttyrady», - dedi Eńbek jáne halyqty áleýmettik qorǵaý mınıstri Mádına Ábilqasymova.
Buǵan qosa, zań jobasy jumyspen qamtýdyń jekeshe agenttikterine azamattardy jumysqa ornalastyrýǵa múmkindik beredi. Osy baǵytta halyqty jumyspen qamtý salasyndaǵy qyzmetterdiń aýtsorsıngi uǵymy engizildi.
«Bastapqy kezeńde aýtsorsıngke jumyssyzdarǵa kásiptik baǵdar berý men jumysqa ornalastyrý boıynsha qyzmetterdi berý usynylady. Bul bıyl 60 myńdaı adamdy jumyspen qamtýǵa múmkindik beredi», - dep naqtylady mınıstr.
Zań jobasynda Eńbek mınıstrliginiń quzyretine kelesi qyzmetterdi júzege asyrý kiredi: Bıýdjet qarajaty esebinen halyqty jumyspen qamtý salasyndaǵy qyzmetterge arnalǵan tarıfterdi qalyptastyrý ádistemesin ázirleý; Halyqty jumyspen qamtý salasyndaǵy qyzmetterdiń aýtsorsıngi aıasynda usynylatyn qyzmetter tizbesin maquldaý.
Munymen qosa, qujatta halyqty jumyspen qamtýǵa járdemdesý quraldaryn jetildirý kózdeledi. Jumyspen qamtýǵa júginý rásimderi jeńildetiledi. Jumys izdeýshiler endi jumyspen qamtý ortalyqtaryna «elektrondyq úkimet» veb-portalymen ǵana emes, sonymen qatar HQKO-lar arqyly da júgine alady.
Aıta keteıik, memlekettik jáne úkimettik baǵdarlamalar aıasynda qurylatyn bos jumys oryndaryna monıtorıng júrgizý quzyreti ortalyq jáne jergilikti atqarýshy organdarǵa berilmek.
«Stýdentter men joǵary synyp oqýshylary úshin usynylatyn qoǵamdyq jumystarǵa jazǵy demalys kezinde ǵana emes, Eńbek kodeksinde ruqsat etiletindeı oqýdan tys ýaqytta da qatysý múmkindigi keńeıtiledi», - dedi M. Ábilqasymova.
