Boryshkerler sot oryndaýshylarmen aldyn ala kelisip alady - Shpekbaev
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev atqarýshylyq is júrgizýdi óndirý kórsetkishi tómen óńirlerdi atap kórsetti, dep habarlaıdy QazAqparat.
«Atqarýshylyq is júrgizý sany boıynsha óndirip alýdyń tómen kórsetkishteri Mańǵystaý, Batys Qazaqstan jáne Aqmola oblystarynda tirkeldi. Óndirip alýshylarǵa 122 mıllıon teńge bolatyn 34 atqarýshylyq is qaǵazy qaıtarylǵan. Bul birinshi kezekte boryshkerdiń óndirilýi tıis múlkiniń nemese tabysynyń bolmaýymen baılanysty. Tipti boryshker men oryndaýshy aldyn ala kelisip, boryshker óz múlkin satyp nemese ózgeniń atyna aýdaryp úlgerýi múmkin», - dedi Alık Shpekbaev.
Onyń aıtýynsha, jekelegen jaǵdaılarda jemqorlyqqa ádeıi ıtermeleıtin sátter bolady. Bir ǵana 2016 jyl sot oryndaýshylardyń qyzmetine qatysty aıyppuldy óndirip alý týraly 6 myńnan astam qaýly tústi. Alaıda aıyppuldardyń basym bóliginiń tólenip qoıǵany anyqtalǵan.
«Bul ákimshilik tájirıbe jelisi boıynsha tıisti baqylaýdyń joqtyǵyn jáne kórsetilgen rásimderdi avtomattandyrý qajettigin kórsetedi. Sot oryndaýshylarynyń zańsyz baıýyna kómektesetin keń taralǵan ádisterdiń biri - múlikke tyıym salý. Keı jaǵdaılarda tyıym salynǵan múliktiń kólemi óndirip alý somasynan da asyp ketedi», - dep atap ótti A.Shpekbaev.
Tórańanyń orynbasary, mysal retinde Aqtóbe oblysynda bolǵan oqıǵany keltirdi. Onda jeke sot oryndaýshysy «Bakısheva» JK jalpy somasy 28 mln teńgeden asatyn barlyq múlkine tyıym salǵan, biraq óndirip alý somasy 263 myń teńgeni ǵana quraǵan. Jınalysta keltirilgen mundaı mysaldar jeterlik. Buǵan deıin habarlanǵandaı, Qazaqstanda Ádilet mınıstrligine túsetin árbir ekinshi aryz sot aktileriniń oryndalýymen baılanysty. ıAǵnı, 7378 aryzdyń 3798-i nemese 51,4%-y Sot aktilerin oryndaý boıynsha departamenttiń qyzmetine túsken.
Resmı derekterge sáıkes, sot aktileriniń naqty oryndalýy 43 paıyzdy ǵana quraıdy, 298 múlik isteriniń 128-i oryndalǵan. Qaıtarylǵan shyǵyn somasy - 38%, ıaǵnı 2,8 mlrd teńgeniń 1 mlrd-y qaıtarylǵan.
