Boryshkerler shaǵymdaný quqyǵyn kóbine teris paıdalanady – Qanat Mýsın

NUR-SULTAN. QazAqparat – Boryshkerler shaǵymdaný quqyǵyn kóbine teris paıdalanady. Bul týraly búgin Májilistegi Úkimet saǵatynda Ádilet mınıstri Qanat Mýsın aıtty, dep habarlaıdy QazAqparat tilshisi.

«Búgingi tańda zań boıynsha jeke sot oryndaýshynyń áreketteri men sheshimderine tek sot arqyly shaǵymdanýǵa bolady. Mundaı sot daýlary barlyq satylardy qosa alǵanda 11 aıǵa deıin sozylýy múmkin. Bul rette sottyń negizgi sheshimi oryndalmaı jata beredi. Adamdar sot ózderiniń paıdasyna óndirip bergen nárseni ala almaıdy. Boryshkerler shaǵymdaný quqyǵyn kóbine teris paıdalanady jáne onyń oryndaý protsesin sozý úshin paıdalanady. Osy ýaqyt ishinde olar múlik pen aqshany jasyrady», - dedi mınıstr.

Onyń atap ótýinshe, sot tájirıbesinde jeke sot oryndaýshylaryna qatysty 200-ge jýyq talap-aryz tatýlasýmen nemese myńnan astam talap-aryz qaıtaryp alýmen aıaqtalǵan.

«Daý sotqa deıin óńirlik palatalar deńgeıinde sheshilýde. Mundaı tájirıbeni jarııa etý jáne óńirlik palatalarynyń laýazymdy adamdaryna jeke sot oryndaýshylarynyń sheshimderin joıý jóninde ókilettikter berý qajet dep oılaımyz. Bul daýlardy qaraý ýaqytyn qysqartady jáne taraptardyń quqyqtaryn qorǵaýǵa oń áser etedi», - dedi Qanat Mýsın.