Borysh júktemesin tómendetýge qosymsha qarajat suralǵan joq – Eńbek mınıstrligi

NUR-SULTAN. QazAqparat – QR Eńbek jáne halyqty áleýmettik qorǵaý mınıstrligi borysh júktemesin tómendetý úshin qosymsha qarajat suraǵany týraly aqparatty teriske shyǵardy, dep habarlaıdy QazAqparat.

«QR Eńbek jáne halyqty áleýmettik qorǵaý mınıstrliginiń 2020 jyly borysh júktemesin tómendetý úshin qosymsha qarajat suraǵany týraly BAQ-ta jarııalanǵan aqparat shyndyqqa sáıkes kelmeıdi», - dep habarlandy mınıstrliktiń Facebook jelisindegi resmı paraqshasynda.

QR azamattary úshin borysh júktemesin tómendetý 2019 jyly Memleket basshysynyń tapsyrmasy boıynsha júrgizildi jáne bir rettik qana aktsııa boldy.

«Bul naýqan ótken jyly aıaqtaldy, onyń qorytyndysy boıynsha jalpy somasy 115 mlrd teńgege 554 myń adam úshin kepilsiz tutyný kredıtteri boıynsha bereshekter óteldi», - deıdi mınıstrlik.