Bortynda 150 adamy bar krýızdik laıner Andaman teńizinde jartasqa soǵyldy
NUR-SULTAN. QazAqparat - La Belle Des Oceans krýızdik laıneri taılandyq Phı-Phı araldary mańynda Andaman teńizinde jartasqa kelip soǵylǵan, dep habarlaıdy QazAqparat Maritime Bulletin basylymyna silteme jasap.
Dúısenbi kúni Maritime Bulletin basylymy jazǵandaı, keleńsiz jaǵdaı jergilikti ýaqyt boıynsha 02:00-03:00 aralyǵynda oryn alǵan.
Qolda bar málimetter boıynsha, kemeniń bortynda 90 jolaýshy jáne 60 ekıpaj múshesi bolǵan.
Oqıǵa saldarynan laınerdiń aldyńǵy bóliginiń korpýsy sýǵa batyp ketken. Soǵan qaramastan keme Taılandtyń áskerı teńiz kúshteriniń baqylaýymen Phýket aralyna deıin ózdiginen jetken. Saǵat 10:30 shamasynda borttaǵy barlyq adam qaýipsiz jerge kóshirildi.
Belgııa jalaýy bar La Belle Des Oceans Malaızııanyń Pınang aralynan Phýket mańyndaǵy Taılandtaǵy Phangnga shyǵanaǵyna bara jatqan.
