«Borovıchok» demalys aýmaǵynda jazǵy saýyqtyrý maýsymy saltanatty túrde ashyldy (FOTO)
ASTANA. QazAqparat - Aqmola oblysy Aqkól aýdanynyń «Borovıchok» demalys aýmaǵynda jazǵy saýyqtyrý maýsymy saltanatty túrde ashyldy.
Onda elordalyq Balalar úıiniń 130 tárbıelenýshisi demalady. Bul týraly Astana qalalyq bilim basqarmasynan habarlady.
«Balalyq shaq - bul men jáne sen!» merekelik baǵdarlamasy balalardyń kóńilinen shyqty. Sharany elorda ákimdigi "Balalar úıi" KMM qyzmetkerleri Astana qalasynyń Bilim basqarmasymen jáne QR UQK kýratorlarymen birlese uıymdastyrdy.
Balalardy Astana qalasy Іshki ister departamenti Kadrlyq jumys basqarmasy bastyǵynyń orynbasary, polıtsııa podpolkovnıgi Baıkenov Saıat Serikuly, QR UQK organdarynyń ardageri, otstavkadaǵy polkovnık Abdrashıtov Leonýr Shavketovıch, QR UQK Kadr departamenti basqarmasy basshysynyń orynbasary, polkovnık Besetaeva Gúljan Shahmanqyzy, QR UQK-nen kýratorlar quttyqtady.
Sharanyń basty maqsaty - jazǵy ýaqytta Balalar úıiniń tárbıelenýshilerin saýyqtyrýǵa jaǵdaı jasap, jazǵy saýyqtyrý maýsymyn ashý.
Bul kúni barlyq balalar saltanatty jınalysta bas qosyp, belsendilerge syılyqtar tabys etildi. Sodan keıin «Júrek jylýyn syılaımyn» merekelik kontserti ótti. Ony Balalar úıiniń shyǵarmashylyq ujymdary uıymdastyrdy. «Asyl arman» horeografııalyq ansambli ózderiniń myń buralǵan bılerimen tánti etse, «Nur Astana» jáne «Aıgólek toby» ánnen shashý shashty, «Adyrna» dombyra ansambli de ónerlerimen kópshilikti tamsandyrdy.
Igi dástúr boıynsha barlyq balalar úshin dastarhan jaıylyp, olar balmuzdaqtan, táttiler men jemisterden dám tatty.
Jazǵy estradada barlyq otbasylardan «Quttyqtaý haty» daıyndaldy.
Sporttyq sharalar da tasada qalmady. Fýtbol boıynsha Ýrıýpın Balalar úıiniń komandasymen joldastyq kezdesý ótti.
Keshqurym balalar úshin «Dostar arasynda» bı keshi uıymdastyryldy.
Taza aýa, ásem tabıǵat, yńǵaıly turǵyn korpýstar, qolaıly turmystyq jaǵdaılar balalardyń aldaǵy oqý jylyna kúsh-jiger jınaýyna múmkindik beretini sózsiz. «Borovıchok» demalys aýmaǵynda balalardyń tanymdyq, estetıkalyq jáne shyǵarmashylyq damýyna basa nazar aýdarylady. Balalar úıirmeler men sektsııalarǵa qatysyp, jazǵy mektep pen kitaphanada bilim kókjıegin keńeıte alady.
