Borodýlıha aýdany gýmanıtarlyq kómek aldy

SEMEI. QazAqparat – Órttiń alǵashqy kúnderinen-aq Borodýlıha aýdanyndaǵy apatqa eriktiler men qamqor azamattar jáne jergilikti ákimdik kómekke keldi, dep habarlaıdy QazAqparat ákimdiktiń baspasóz qyzmetine silteme jasap.

Gýmanıtarlyq kómekti jınaýǵa memlekettik organdar men partııa uıymdary ǵana emes, kásiporyndar, jeke tulǵalar, kommertsııalyq emes uıymdar, máslıhat depýtattary, Dostyq úıi men Qazaqstan halqy Assambleıasynyń ókilderi de atsalysty. Olar órtten zardap shekkenderge azyq-túlik, dári-dármek sııaqty eń birinshi qajet zattardy jóneltip jatyr. Barlyq gýmanıtarlyq kómek arnaıy kólikterge tıelip, órtpen belsendi túrde kúres júrgizilip jatqan aýmaqtarǵa – Borodýlıha-Jernovka men Ozerkı-Talıtsaǵa jetkizildi.

Kún saıyn 80-ge jýyq jergilikti erikti men Semeı, Óskemen jáne Astana qalalarynan 100-den astam adam órtti sóndirýge kómektesip jatyr. Olardyń ornyn ózge de janashyr azamattar almastyryp otyr. Tek sońǵy táýlikte 1,5 tonna aýyz sý, 400 keli qoı eti, qus eti, 600 keli kókónis (kartop, pııaz, sábiz), 100 lıtrden astam maı berildi. Sharýa qojalyqtarynyń basshylary azyq-túlik jetkizý úshin eki kólik bóldi.

«Osyndaı qıyn sátte bárimiz judyryqtaı jumylýymyz kerek. Bizdiń Otanymyz bir. Bul apatty da birge eńserýimiz kerek», - deıdi Semeıdiń belsendi volonterleriniń biri Evgenııa Pavel.