Bórli aýdanynyń bıýdjeti 9,5 mlrd teńgeden asty

Onyń aıtýynsha, qazirgi ýaqytta Aqsaı qalasyndaǵy 4-inshi jáne 5-shaǵynaýdandarda jylý qazandyǵy salynyp, qala ishindegi 17 kóshe men aýdandyq aýrýhana jóndeýden ótti. Sondaı-aq 240 orynǵa arnalǵan balabaqsha qurylysy men 120 páterlik kóp qabatty turǵyn úıdiń qurylysy bastaldy. «Nurly jol» baǵdarlamasy boıynsha Aleksandrov, Bórli aýyldaryn aýyz sýmen qamtamasyz etý, Bestaý sý toǵanyn, Aqsaı qalasyndaǵy shaǵynaýdandardyń jylý jelisin jáne ystyq sý júıesin qalpyna keltirý sharalary júrgizilse, «Óńirlerdi damytý» baǵdarlamasy aıasynda 34,4 shaqyrym jol jóndelýde. Sondaı-aq 9 qabatty 3 úı, 300 oryndyq mektep pen 100 oryndyq ınternattyń jobalyq-smetalyq qujattamasy jáne 1000 jer teliminiń qujattary daıyndalýda. Mádenıet jáne bilim berý mekemelerin kúrdeli jóndeý jáne kóshelerdi abattandyrý jumystary da qarqyndy júrýde. Respýblıkalyq mańyzy bar Oral-Orynbor tasjolyn jóndeý jumystary da josparǵa engizildi. Bul aýqymdy joba aldaǵy eki-úsh jylda júzege asatyn bolady.



Aqsaı qalasynyń 50 jyldyǵyna oraı shaharda «Qarashyǵanaq» dene shynyqtyrý-saýyqtyrý kesheniniń ashylýy óńirdegi eleýli oqıǵa boldy. 1200 orynǵa arnalǵan stadıony bar, barlyq qajetti qural-jabdyqpen qamtamasyz etilgen keshen qurylysy memlekettiń qoldaýymen júzege asty. Nysan tolyqtaı «QPO b.v.» kompanııasy esebinen qarjylandyryldy. Bul sporttyq keshen Prezıdent tapsyrmasyna sáıkes boı kóterdi. Bıyl óńirde 4 sporttyq keshen salynsa, sonyń ekeýi Bórli aýdanynda.



Elbasy N.Nazarbaev keshe ǵana Ashhabadta ulttyq quramanyń sportshylarymen kezdesken sátinde: «Bizdiń jastarymyz - daryndy. Jyl saıyn sportta jańa esimder shyǵyp jatyr. Jalpy, jas jetkinshekter Sizderdiń jeńisterińizge qarap, sportpen shuǵyldanýǵa umtylatyn bolady. Ol salaýatty ult qalyptastyrýdyń basty sharty bolyp sanalady» dep, salaýatty ómir saltyn nasıhattaýdyń mán-mańyzyn erekshe atap kórsetti. Osyǵan oraı Batys Qazaqstanda da turǵyndardyń sportpen turaqty aınalysýyna barynsha jaǵdaı jasalatyn bolady.



Aıta ketý kerek, Elbasynyń tikeleı baqylaýynda turǵan Berezov jáne Bestaý aýyldarynyń turǵyndaryn kóshirý máselesi de josparǵa sáıkes júzege asýda. Bul maqsatqa «QPO b.v.» kompanııasynyń qarjysy esebinen Araltal aýylynda 100 bir qabatty jáne Aqsaıda árqaısysy 153 páterden turatyn eki 9 qabatty úı salý kózdelgen bolatyn. Kúni búgin 100 úıdiń qurylysy tolyqtaı aıaqtalyp, 70-ke jýyq otbasy kóship keldi. Sonymen qatar bıylǵy jyldyń shilde aıynda 320 oryndyq balabaqsha paıdalanýǵa berilse, 300 oqýshyǵa arnalǵan jańa mektep pen Aqsaıdaǵy qos kóp qabatty úı qazan aıynda tapsyrylady dep kútilýde.

 

Atalmysh aýyl turǵyndaryn qonystandyrý bıyl tolyqtaı aıaqtalady.