Bórli aýdanynda jappaı kásipkerlikti damytý baǵytynda 97,5 mln astam teńge bólindi - BQO
ORAL. QazAqparat - Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń «Jappaı kásipkerlikti damytý» 2-baǵyty boıynsha Bórli aýdanyna 97,583 mln teńge bólindi, dep habarlaıdy «QazAqparat» tilshisi.
Aýdandyq jumyspen qamtý ortalyǵynyń dırektory Ǵalııa Baımuqashevanyń aıtýynsha, bıyl baǵdarlamaǵa qatysýshy alty adam óz isterin keńeıtý úshin 36,8 mln teńge nesıe aldy. Sonymen qatar jeti úmitkerdiń 59,4 mln teńgeni quraıtyn qujattary qaralý ústinde.
«Baǵdarlamaǵa qatysýshylardy tehnıkalyq jáne kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha qysqa merzimdi kásibı oqý úshin 39,779 mln teńge qaraldy. Jospar boıynsha 228 adam qysqa merzimdi kýrstan ótý kerek bolsa, 10 tamyzǵa deıin 108 adam balabaqsha tárbıeshisiniń kómekshisi, dánekerleýshi, aspaz, shashtaraz mamandyqtary boıynsha oqýǵa joldandy.
Baǵdarlamanyń «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» 3-baǵytyna sáıkes naqty jumystar atqarylýda. Jyl basynan beri aýdandyq jumyspen qamtý ortalyǵyna 1692 adam jumys izdep, jolyqty. Jumyspen qamtý sharalarymen 1275 adam qamtylsa, sonyń ishinde 889-y turaqty jumys tapty. 39-y áleýmettik jumys oryndaryna, 102-si jastar tájirıbesine, 273-i qoǵamdyq jumysqa joldandy. Bıylǵy jeti aıda 330 adam jumyssyz retinde tirkeldi.
Zańdy jáne jeke tulǵalarmen, sondaı-aq iske qosylǵan óndiristerdi keńeıtý esebinen jyl basynan beri 681 jumys orny (jospar - 331) ashyldy. Sol sekildi memlekettik jáne úkimettik baǵdarlamalar aıasynda 97 jumys orny (jospar - 108) paıda boldy. Eńbek resýrstarynyń tabıǵı jyljýyna baılanysty bosatylatyn jumys oryndary esebinen 332 adam (jospar - 998) óz ornyn tapty. Osylaısha, barlyǵy 1110 jumys orny (jospar - 1437) ashyldy.
Áleýmettik jumys oryndaryna 5,121 mln teńge bólinse, sonyń 2,586 mln. teńgesi ıgerildi. Jastar tájirıbesine respýblıkalyq bıýdjetten kelgen 14,295 mln teńgeniń 5,457 mln teńgesi, jergilikti qazynadan qaralǵan 17,157 mln. teńgeniń 7,924 mln teńgesi ıgerildi. Aqyly qoǵamdyq jumystarǵa berilgen 35,031 mln teńgeniń 22,257 mln teńgesi jumsaldy.
Memlekettik baǵdarlamanyń ıgiligin kórgeli otyrǵandardyń biri - Mahabbat Torǵaeva. Ol negizgi mamandyǵy - esepshilik boıynsha turaqty jumys taba almaǵannan keıin aýdandyq jumyspen qamtý ortalyǵyna tirkelgen. Endi ol aspaz mamandyǵyn meńgermekshi. «Aspaz mamandyǵy janyma jaqyn. Áıel adam bolǵan soń kóp ýaqytymyz as úıde ótedi. Degenmen ár mamandyqtyń qyr-syry kóp. Sondyqtan aspazdyqty tolyq meńgerýime kolledj ustazdary kómek berýde. Osynyń bári - Elbasy tapsyrmasyna sáıkes qolǵa alynǵan memlekettik baǵdarlamanyń arqasy», dedi ol. Mahabbatpen birge aspazdyqty 25 adam meńgerýde. Sol sekildi jas maman Meırambek Sydyqov aýdandaǵy jastarmen jumys jónindegi resýrstyq ortalyqqa jastar tájirıbesi boıynsha qabyldanyp, jumys jasaýda. Ol da el erteńi - jastarǵa memleket tarapynan zor qoldaý kórsetilip otyrǵanyn jetkizdi.
Aıta keteıik, Bórli aýdanynda jyl basynan beri úsh ret bos oryndar jármeńkesi ótkizildi. Sonyń nátıjesinde turaqty jumys tapqandar az emes.
