Bórli aýdanynda 18 adam óz isin keńeıtý úshin 109,2 mln teńge nesıe aldy - BQO
ORAL. QazAqparat - Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda Bórli aýdanynda naqty jumystar atqarylýda, dep habarlaıdy «QazAqparat» tilshisi.
Aýdandyq jumyspen qamtý ortalyǵynyń mamany Ásemgúl Esqaıyrovanyńń aıtýynsha, baǵdarlamaǵa qatysýshylardy tehnıkalyq jáne kásiptik bilimmen, qysqa merzimdi kásiptik oqýmen qamtamasyz etý boıynsha respýblıkalyq bıýdjetten 39,779 mln teńge bólingen bolatyn. Barlyǵy 228 adamdy qysqa merzimdi kásibı oqytý josparlansa, sonyń 145-i oqýǵa joldanǵan. Al 30 adam kásibı oqýǵa jiberilgen. Bul mamandyqtar arasynda avtokad, 1S býhgalterlik esep, is júrgizýshi, tárbıeshiniń kómekshisi, dánekerleýshiler, aspazdar, shashtarazdar jáne basqalar bar.
Baǵdarlamanyń «Jappaı kásipkerlikti damytý» 2-baǵyty boıynsha bıyl eki adam óz isin ashyp, kásipkerlikti qolǵa aldy. Al 18 adam óz isterin keńeıtý úshin respýblıkalyq bıýdjetten 109,2 mln teńge nesıege qol jetkizdi.
Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý da nazardan tys qalǵan emes. Jyl basynan beri atalmysh ortalyqqa 1 897 adam jumys izdeýshi retinde jolyqqan bolatyn. Barlyǵy 1 468 adam jumyspen qamtý sharalarymen qamtylsa, sonyń ishinde 985-i turaqty jumysqa ornalasty, áleýmettik jumys oryndaryna 44 adam joldandy. Jastar tájirıbesinde 114 adam júr. Al 288-i qoǵamdyq jumysqa tartyldy. Qazirgi ýaqytta 274 turǵyn jumyssyz retinde tirkeýde tur.
Jastar tájirıbesine qabyldanyp, keıin sol mekemede turaqty jumysqa qalyp jatqandar da bar. Solrdyń biri - Ksenııa Slıvnaıa. «Bórli aýdany boıynsha salyq basqarmasyna jastar tájirıbesimen kelip, qazir jetekshi maman bolyp jumys jasap júrmin. Bul jerde úırenetin nárse kóp. Maǵan mekemeniń qyzmeti unaıdy. Ári meniń mamandyǵyma sáıkes keledi. Aqsaıdaǵy Batys Qazaqstan ınjenerlik-ekonomıkalyq kolledjin bitirdim. Jumyspen qamtý ortalyǵy osynda jastar tájirıbesi boıynsha joldaǵan bolatyn. Eki aı ótken soń bos orynǵa konkýrs jarııalanǵanyn kórip, test tapsyryp, áńgimelesýden ótip, memlekettik qyzmetke qabyldandym. Barlyq oqý bitirgen túlekterge jastar tájirıbesi arqyly jumysqa ornalasýǵa keńes beremin. Óıtkeni bul mamandyq boıynsha tájirıbe jınaqtaýǵa zor múmkindik beredi», - deıdi jas maman.
Bórli aýdany boıynsha salyq basqarmasy basshysynyń orynbasary Ermek Alǵazıev jyl saıyn bul mekemege 15-20 shaqty jas maman jastar tájirıbesi boıynsha qabyldanatynyn aıtady. «Mekemede tórt bólim bolsa, solardyń basshylary jas mamandardyń jumysyn qadaǵalap, baǵyt-baǵdar berip otyrady. Bizge qajetti maman bola alatyn jastardy ózderi tańdap, usynady. Árıne, ol úshin jas mamandar ózderin jaqsy jaǵynan kórsetip, jaýpkershiligi mol, eńbekqor bolýlary qajet. Bos oryndar úshin ótetin konkýrstar jóninde tájirıbege kelgen jastardy habardar etip otyramyz. Ózderiniń jumysyn unatqandar test tapsyryp, sertıfıkatyn alǵandar memlekettik qyzmetke ótedi. Jastar tájirıbesine qatysýshylar arasynda Ksenııa Slıvnaıa jaqsy daıyndalyp, suraqtarǵa da oıdaǵydaı jaýap berip, eń jas maman retinde jumysqa kirdi. 2015 jyly jastar tájirıbesimen kelgen Aıdana Orazǵalıeva degen jas mamandy jumysqa qabyldaǵan edik. Bizdiń mekemede túrli jaǵdaılarǵa baılanysty, máselen, qonys aýdarý, basqa jumysqa aýysý nemese zeınetkerlikke shyǵý sııaqty túrli sebeptermen bos oryndar bolyp turady. Sondyqtan aldaǵy ýaqytta da jastardyń eńbekke ornalasýyna múmkindik bar», - dedi Ermek Alǵazyuly.
Aýdan ortalyǵyndaǵy Aqsaı tehnıkalyq kolledjinde aspazdyń 3 aılyq kýrsyn oqyǵan jannyń biri - Aıjan Ǵalymova. Negizgi mamandyǵy basqa bolsa da, ózi unatqan kásiptiń qyr-syryn meńgerýge bel býǵan eken. «Negizi ózime tamaq pisirgen unaıdy. Ylǵı da meıramhana, kafelerde aspaz bolyp eńbek ettim. Mende aspaz degen arnaıy qujat joq. Qyzdardan osy baǵdarlama jóninde estip, arnaıy bilim alýdy jón kórdim. Úsh aı oqyp, emtıhan tapsyrdym. Bul baǵdarlama óte jaqsy, tıimdi. Kóp nársege úıretti», - degen Aıjan Ǵalymova bolashaqta osy sala boıynsha joǵary bilim alýdy josparlap otyr.
Aıta keteıik, aýdandyq jumyspen qamtý ortalyǵynyń málimetine qaraǵanda, bıylǵy 9 aı ishinde tirkelgen zańdy jáne jeke tulǵalarmen jumys oryndaryn ashý, sondaı-aq iske qosylǵan óndiristerdi keńeıtý esebinen 843 jańa jumys orny ashylǵan. Al josparlanǵany - 331 oryn. Sonymen qatar memlekettik jáne úkimettik baǵdarlamalar aıasynda ashylatyn jumys oryndary artyǵymen oryndalǵan (115).
