Boryshkerlerdiń kiris kózderi tekseriledi

ASTANA. KAZINFORM – Boryshkerlerdiń 329 kóligi arnaıy turaqqa qoıyldy. Bul týraly Ádilet mınıstrliginiń resmı ókili Talǵat Ýálı aıtty.

«Respýblıka boıynsha «Boryshker» reıdtik is-sharasy aıaqtaldy. Sot oryndaýshylar qańtar aıynan beri boryshkerler men olardyń múlkin anyqtaý boıynsha 93 is-shara ótkizdi, onyń nátıjeleri boıynsha 329 avtokólik quraly arnaıy turaqqa qoıyldy. boryshkerlerden 226,4 mln.teńge qarjy óndirildi. Mysaly, Shymkent qalasynda – 123, Astana qalasynda – 50, al Abaı oblysynda 42 kólik arnaıy turaqqa jetkizildi», - dedi Talǵat Ýálı. 

Onyń aıtýynsha, boryshkerlerdiń jańa kiris kózderin anyqtaý jáne olardy qaryzdardy óndirip alý úshin paıdalaný múmkindigine taldaý júrgizilgen. Osy baǵytta Ádilet mınıstrligi boryshkerlerdiń elektrondyq ámııandardan, býkmekerlik kompanııalardan, bırjalyq saýdadaǵy baǵaly qaǵazdarmen, krıptovalıýtalarmen bolatyn operatsııalardan, dropshıpıngten, jelilik marketıngten, taksı qyzmetterinen jáne taǵy basqylarynan alynǵan kiristerin tekseredi. 

«Bul tetik qaryzdardy óndirip alýdyń tıimdi quraldarynyń biri bolyp otyr», - dedi ol.