Boryshkerler tizimine engen adamdar bás tige almaıdy – Jańa zań

ASTANA. KAZINFORM – QR týrızm jáne sport vıtse-mınıstri Mıras Tólebaev oıyn bıznesi men lotereıa qyzmetin retteý boıynsha jańa zańnamany túsindirdi.

Tıisti zańǵa 8 shildede qol qoıyldy. Bul qujat 8 kodeks pen 14 zańnyń normalaryn qozǵaıtyn buryn-sondy bolmaǵan 150 túzetýdi qamtıdy.

«Qumar oıyndar men bás tigýdi, onyń ishinde SMS-habarlamalar arqyly jarnamalaýǵa shekteý qoıylady. Býkmekerlerdiń syrtqy jarnamasyna, sonyń ishinde kólik quraldarynda jarnamalaýǵa tyıym salynady. Býkmekerlik keńseler, sport ǵımarattaryna jáne sportshylardyń jabdyqtaryna ǵana ruqsat beriledi. Osyǵan uqsas norma mass-medıaǵa, onyń ishinde ınternet-resýrstarǵa qatysty qarastyrylǵan», - dedi M. Tólebaev Ortalyq kommýnıkatsııalar qyzmetinde ótken brıfıngte.

Sonymen birge, azamattar býkmekerlik keńselerdi jarnamalaıtyn SMS-ter almaıtyn boldy.

«Birinshiden, mundaı habarlamalar abonenttiń kelisiminsiz keledi. Ekinshiden, aqparattyq bıýlleten men vızýaldy jarnama zańdy túrde qumar oıyndarǵa qatysa almaıtyn 21 jasqa tolmaǵan azamattarǵa targetteledi. Mundaı quqyq buzýshylar úshin zań ÁQBtK-niń 455-babyna sáıkes ákimshilik jaýapkershilikti kózdeıdi», - dep túsindirdi spıker.

Sonymen qatar, boryshkerlerdiń biryńǵaı tizilimine engizilgen adamdardy qumar oıyndarǵa jiberýge jáne bás tigýge tyıym salynady. Mundaı adamdar sany, ýákiletti organnyń derekteri boıynsha, shamamen 3,5 mln quraıdy.

«Bul norma azamattardy utys tigip, sonyń esebinen qaryzdardy jabýǵa tyrysý áreketinen qorǵaıdy», - dep atap ótti Mıras Tólebaev.