Boryshkerdi úıden shyǵarýǵa 10 kún beriledi: Sot oryndaýshylar jumysy týraly zań maquldandy
ASTANA. KAZINFORM – Búgin Senat «QR keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zańdy maquldady. Senator Janna Asanova zańdaǵy negizgi ózgeristerdi atady.
Qujat azamattardyń quqyqtary men zańdy múddelerin qorǵaýdy kúsheıtýge jáne atqarýshylyq is júrgizýdi jetildirýge, sondaı-aq sot oryndaýshylardyń kásibı deńgeıi men jaýapkershiligin arttyrýǵa baǵyttalǵan.
Eń aldymen, atqarýshylyq is júrgizýde azamattardyń quqyqtaryn qorǵaýdy kúsheıtý maqsatynda aıyppuldar men salyq bereshekterin óndirip alýdyń jeńildetilgen tártibi keńeıtiledi. Ol úshin óndirip alý shegi 20 AEK-ten 40 AEK-ke deıin ulǵaıtylady.
– Sot oryndaýshylaryna boryshkerlerdi turǵyn úıden shyǵarý týraly keminde 10 kún buryn habarlaý mindeti engiziledi. Bul olarǵa basqa baspana tabýǵa múmkindik beredi. Qazirgi ýaqytta bul merzimdi sot oryndaýshysy ózi belgileıdi jáne turǵyn úıden shyǵarý týraly talap tipti bir kún buryn da berilýi múmkin, – dedi Senat depýtaty.
Atqarýshylyq qujatty oryndaýǵa berý merzimi ótip ketse, oǵan baılanysty qoldanylǵan barlyq májbúrlep oryndatý sharalary avtomatty túrde toqtatylady. Ol úshin aýmaqtyq ádilet organy tıisti qaýly shyǵarady, jekeshe sot oryndaýshylarynyń qatysýy talap etilmeıdi.
Múgedektigi bar adamdarǵa tólenetin memlekettik járdemaqylar men jumysynan aıyrylýyna nemese eńbekke qabilettiligin joǵaltýyna baılanysty áleýmettik tólemderden óndirip alý mólsheri 25% aspaıtyn bolyp shekteledi.
Alımentti aýdarý úshin óndirip alýshy sot oryndaýshysyna alıment túsetin bank shotynyń derektemelerin usynýǵa tıis bolady. Zańda atalǵan shotqa óndirip alý sharalaryn qoldanýǵa jáne oǵan tyıym salýǵa jol berilmeıdi dep belgilenedi.
– Ekinshiden, jeke sot oryndaýshylardyń qyzmetin baqylaýdy kúsheıtý, olardyń kásibı biliktiligi men jaýapkershiligin arttyrý maqsatynda zańnama men Kásibı ádep kodeksin bilý deńgeıin baǵalaıtyn attestattaý engiziledi. Qaıta attestattaýdan óte almaǵan jaǵdaıda jeke sot oryndaýshynyń lıtsenzııasy keri qaıtarylady. Attestattaý úsh jylda bir ret ótkiziledi. Sot oryndaýshylardyń áreketteri men sheshimderine shaǵymdanýdyń sotqa deıingi tártibi belgilenedi, – dedi Janna Asanova.
Úshinshiden, atqarýshylyq is júrgizýdi odan ári jetildirý maqsatynda tárkilengen múlikti elektrondy saýda-sattyq arqyly ótkizý tártibine ózgerister enedi. ıAǵnı, aýktsıon ótpegen jaǵdaıda óndirip alýshyǵa múlikti sol qalpynda ózine qaldyrý quqyǵy beriledi.
– Atqarýshylyq qujattardy negizsiz basqa okrýgke jiberýdi boldyrmaý úshin olardy orynsyz joldaýǵa shekteý qoıylady. Boryshker bolǵan zańdy tulǵa basshysynyń turǵan jeri belgisiz bolǵan jaǵdaıda oǵan izdeý jarııalaý múmkindigi engiziledi. Óıtkeni tájirıbede uıymnyń da, onyń basshysynyń da naqty qaı jerde ekeni jıi belgisiz bolyp jatady, – dedi Senat depýtaty.
Buǵan deıin gaz tutyný normalaryn engizý, artyq paıdalanǵandarǵa joǵarylatylǵan tarıf qoldaný, gaz jetkizýdegi deldaldardy qysqartý jóninde zań jobasy maquldanǵan edi.
