Boryshkerdi shetelge shyǵýdan shekteý Konstıtýtsııaǵa saı ma — mınıstr jaýaby

ASTANA. KAZINFORM – Májilis depýtat Erbolat Saýryqov sot oryndaýshylardyń qyzmetin jetildirýge arnalǵan Úkimet saǵatynda Ádilet mınıstri Erlan Sársembaevqa osyndaı suraq qoıdy.

Májilis depýtat Erbolat Saýryqov mindetin adal atqarmaǵany úshin lıtsenzııasynan aıyrylǵan jeke sot oryndaýshylar memlekettik qyzmetke tura almaıtyndaı norma qabyldaýdy usyndy.
Bul usynysty Ádilet mınıstri de qoldap otyr.

— Jeke sot oryndaýshy óz mindetterin atqarmaǵany úshin lıtsenzııasynan aıyrylsa, ony memlekettik organdarda laýazymdy qyzmet atqarý quqyǵynan aıyrý týraly usynysty jalpy qoldaımyz. Zań jobasy kezinde mundaı usynysty engizýge bolady dep oılaımyn.
Jeke sot oryndaýshylardyń qyzmetine baǵa berý úshin tsıfrlyq kómekshini iske qosamyz. Bul platforma maýsym aıynda iske qosylady. Osy platformada «qyzyl aımaqqa» kirgen jeke sot oryndaýshylarǵa birden tıisti sharalar qoldanamyz, — dedi Erlan Sársembaev Úkimet saǵatynda.

Sondaı-aq, mınıstr boryshkerdi shetelge shyǵýdan shekteý sharasy Konstıtýtsııaǵa saı dep oılaıtynyn aıtty.

— Mindettemesin oryndamaý zańdy buzý áreketi bolyp esepteletindikten bul shara Konstıtýtsııaǵa qaıshy emes, — dedi vedomstvo basshysy.

Osy jıynda shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júrgeni málim boldy.