Býkmekerlik keńselerge aýdarǵan aqshany qaıtaryp alýǵa bola ma

ASTANA. KAZINFORM — Oıyn bıznesi jáne lotereıany retteý komıtetiniń baspasóz qyzmeti Boryshkerlerdiń biryńǵaı tiziliminde turǵan azamattarǵa, ıaǵnı qumar oıyn, bás tigýge tyıym salynǵan azamattarǵa qatysty túsinikteme berdi.

— Týrızm jáne sport mınıstrliginiń Oıyn bıznesin jáne lotereıany retteý komıteti 2024 jylǵy 15 qarashada taratqan baspasóz relızin keıbir BAQ jáne áleýmettik jeli qoldanýshylary qate túsinip, Boryshkerlerdiń biryńǵaı tiziliminde (BBT) turǵan azamattar býkmekerlik keńselerge aýdarylǵan qarajattaryn qaıtaryp ala alady degen jalǵan aqparat taratqan. Komıtet bul málimetti resmı túrde joqqa shyǵarady, — delingen habarlamada.

«Oıyn bıznesi týraly» zańnyń 15-baby, 1-tarmaǵynyń 3-tarmaqshasyna sáıkes, BBT-da tirkelgen azamattarǵa qumar oıyndarǵa jáne bás tigýge qatysýǵa tolyq tyıym salynǵan. Eger qumar oıyndarǵa nemese bás tigýge zańsyz qatysý anyqtalsa, oıyn bıznesin uıymdastyrýshylar ákimshilik jaýapkershilikke tartylady. Alaıda, bul ákimshilik sharalar aýdarylǵan aqshany májbúrlep qaıtarýdy qarastyrmaıdy.

Komıtet BBT-da turǵan azamattardy qumar oıyndar men bás tigýge qatysýdan aýlaq bolýǵa shaqyrady jáne olardyń mundaı áreketterden ózderin qorǵaý qajettigin eskertedi.

— Komıtet býkmekerlik keńselerdiń shottaryna aýdarylǵan qarajattardy qaıtarýmen aınalyspaıdy jáne mundaı qyzmet kórsetýge ýákiletti emes. Eger qarajatty qaıtarýǵa qatysty daýlar týyndasa, azamattarǵa sotqa deıingi retteý sýbektilerine júginý kerek. Azamattyq kodekstiń 9-babyna sáıkes, sotqa shaǵymdaný usynylady, — dep túsindirdi vedomstvo.

Azamattarǵa tek lıtsenzııalanǵan býkmekerlik keńselerdiń resmı saıttarynda tirkelýge keńes beriledi. Lıtsenzııalanǵan keńselerdiń tizimimen myna silteme arqyly tanysýǵa bolady.  

Buǵan deıin habarlaǵanymyzdaı, Oıyn bıznesin jáne lotereıany retteý komıteti onlaın qabyldaýdy iske qosty.