Boryshker lýdomandardy JSN arqyly anyqtaý tetigi engizilýi múmkin
ASTANA. KAZINFORM — Bás tigýshilerdiń arasyndaǵy salyq, alıment, nesıe bereshegi bar adamdardy qumar oıynnan shekteý úshin JSN-derin sáıkestendirý tásilderi pysyqtalyp jatyr.
Bul týraly Týrızm jáne sport mınıstriniń orynbasary Mıras Tólebaev vedomstvonyń alqa májilisinde málim etti.
Vıtse-mınıstrdiń aıtýynsha atalǵan tetik qandaı da bir materıaldyq qaryzy bar azamattardyń jaǵdaıyn odan ári qıyndatpaý úshin qabyldanbaq.
— Boryshkerlerdiń biryńǵaı tiziliminde tirkelgen 3 mıllıonǵa jýyq adam qumar oıyndardan shettetildi. Búginde atalǵan tizilimge engizilgen 15 myńǵa jýyq azamattardyń akkaýnttary buǵattaldy. Qazirgi ýaqytta, Ádilet jáne Tsıfrlandyrý mınıstrlikteriniń qoldaýymen bás tigýshilerdiń JSN-derin avtomatty túrde boryshkerler tizilimimen sáıkestendirý máselesi pysyqtalýda, — dedi ol.
Mıras Tólebaev byltyr boryshkerlerden bás qabyldaýdyń 80 faktisi tirkelip, oǵan jol bergen 5 býkmekerlik keńseniń ústinen ákimshilik is qozǵalǵan, 1 keńse jaýapqa tartylǵan.
— Boryshkerlerden bólek 85 myńnan astam memlekettik qyzmetshilerge, 70 myń áskerı qyzmetshilerge, 100 myńǵa jýyq quqyq qorǵaý jáne arnaıy organdardyń qyzmetkerlerine qumar oıyndar men bás tigýge tyıym salyndy, — dedi vıtse-mınıstr.
Eske salsaq, buǵan deıin Astana qalasynda ajyrasý talabymen sotqa túsken 100 istiń ishinde 1-2 istiń sebebi lýdomanııa bolatyny aıtylǵan edi.