Boryshyn ótep júrgen sarbazdarǵa zańdy túrde kredıttik demalys rásimdeledi
Parlament Májilisi «Kredıt berý kezinde táýekelderdi azaıtý, qaryz alýshylardyń quqyqtaryn qorǵaý, qarjy naryǵyn retteý jáne atqarýshylyq is júrgizýdi jetildirý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyn qabyldady.
Parlament Senatynda qaralǵannan keıin ol Memleket basshysyna qol qoıýǵa beriledi.
«2022 jyldan bastap merzimdi qyzmettegi sarbazdarǵa arnalǵan jeńildik Qorǵanys mınıstrligi men QR Qarjy naryǵyn retteý jáne damytý agenttigi arasynda jasalǵan memorandým negizinde iske asyrylyp keledi.
Іs júzinde áskerge shaqyrý naýqany kezinde áskerge shaqyrylýshylar ekinshi deńgeıdegi bankter men basqa qarjy ınstıtýttary aldyndaǵy nesıelik mindettemelermen áskerge barǵysy kelmeıtindigin aıtady», — dep jazdy Qorǵanys mınıstrliginen.
Memorandým qabyldanǵanǵa deıin bankter men mıkroqarjy uıymdary jasalǵan sharttar boıynsha aı saıynǵy tólemderdi toqtatqan joq.
Osy jaǵdaılardy eskere otyryp, Májilistiń Halyqaralyq ister, qorǵanys jáne qaýipsizdik komıtetiniń depýtattary «Qazaqstan Respýblıkasyndaǵy bankter jáne bank qyzmeti týraly», «Mıkroqarjylyq qyzmet týraly» jáne «Kollektorlyq qyzmet týraly» zańnamalyq aktilerge túzetýler engizdi.
Onyń negizinde bankter, mıkroqarjy uıymdary jáne kollektorlyq agenttikter merzimdi áskerı qyzmet ótkerýdiń barlyq kezeńinde áskerı mindetin ótep júrgen sarbazdarǵa negizgi borysh pen syıaqy boıynsha tólemdi keıinge qaldyrýdy júzege asyrdy.
Zańnyń kúshine enýi nesıe boıynsha keıinge qaldyrý rásiminiń quqyqtyq negizin qamtamasyz etedi. Memlekettik organdardyń, bankterdiń, mıkroqarjy uıymdary men kollektorlyq agenttikterdiń aqparattyq júıelerin ıntegratsııalaýdyń arqasynda «kredıttik demalys» avtomatty túrde beriletin bolady.
