Borıs Ýgaı: Qazaq tilin úırený - árqaısymyzdyń mindetimiz
Borıstiń anasy - Elena Ýgaı Elena shırek ǵasyr boıy ishki ister organdarynda qyzmet istegen. Qazir QR Іshki ister mınıstrligine eńbek sińirgen zeınetker, zapastaǵy polkovnık. Anasy ulyna bala kezinen óte jaqsy tálim-tárbıe berdi. Ózi de qazaq tilin jetik meńgerdi. Óziniń osyndaı qasıetiniń arqasynda ózge áriptesterine úlgi bola bildi.
Anasynyń izbasary atanǵan Borıs Qyzylorda qalasynda 1986 jyly dúnıege kelgen. Qaladaǵy № 198 orys mektebinde bilim alsa da oqý ordasynda júrgen kezden-aq qazaq tilin erkin meńgerdi. Óz qatarlastarynan ozyq boldy. Qazaq tili páninde ol únemi belsendi kórinip, ustazdar nazaryna ilikti. Mektepti bitirgennen keıin Qyzylorda qalasyndaǵa Qazaq gýmanıtarlyq zań ýnıversıteti fılıalynda bilim aldy.
Qazir Borıs Qyzylorda qalalyq Polıtsııa basqarmasynyń jedel basqarý ortalyǵynyń beınebaqylaý ınspektory qyzmetin atqarady. Qazaq tili oqytý kýrstaryna qatysyp, bilimin jetildirip otyrady.
«Men Qyzylorda qalasynda týyp-óstim. Oryssha bilim beretin mektepte oqydym. Qazaq tili páninen tek bes degen baǵa alatyn edim. Tilge degen qyzyǵýshylyǵym sol kezden bastaldy. Orys mektepteriniń arasynda qazaq tili páni boıynsha ótken qalalyq olımpıadada júldeli oryn ıelendim. Bul maǵan jańa tanystar men dostar tabýyma sebepshi boldy. Jergilikti ult ókilderi balalarymen birge oınap óstim. Elimizdegi barsha ult ókilderi qazaq tilin erkin meńgerip ketedi dep oılaımyn. Bul - árbirimizdiń mindetimiz», - deıdi ofıtser.
Qyzylorda oblysynyń Polıtsııa departamentinde 11 ózge ult qyzmet etedi. Olardyń barlyǵy tatýlyq pen dostyq dánekeri retinde ónege kórsetip keledi.
Polıtsııa kapıtany Borıs Ýgaı barsha qazaqstandyqtardy birlik merekesimen quttyqtaıdy.
«Qazaqstan halqyn dostastyq, yntymaq pen birlik kúnimen quttyqtaımyn. Birligimiz artyp, tatýlyq týy jelbireı bersin», - deıdi ol.