Borıs Kerimbaev: Otan qorǵaýshy - eń qasıetti mamandyq
ALMATY. Mamyrdyń 7-si. QazAqparat /Erlik Erjanuly/ - Áskerı mindetti oryndaý árbir azamat úshin zor abyroı, dedi búgin qarýlastary arasynda "qara maıor" atanyp ketken Aýǵan soǵysynyń qaharmany, ardager Borıs Kerimbaev Almatyda Táýelsizdik monýmentine gúl shoǵyn qoıý kezinde,
dep habarlaıdy QazAqparat.
"Táýelsizdik jyldary Qazaqstan burynǵy keńestik respýblıkalardyń arasynda áleýmettik-ekonomıkalyq kórsetkishterimen ǵana emes, saıası bedeli men áskerı kúsh- qýaty jaǵynan da qaryshtap ósti. Aýyz toltyryp aıtar jetistikterimiz jetkilikti. Oǵan aldyńǵy aǵa býynnyń qosqan úlesi óte qomaqty. Sondyqtan da barlyq soǵys jáne eńbek ardagerlerine zor densaýlyq tileımin", deıdi Borıs Túgeluly. Onyń aıtýynsha, áskerı qyzmet - eń abyroıly mindet. Ókinishke oraı, Qazaqstan armııasynyń abyroıyn asqaqtata túser fılmder men ádebı jáne dramalyq shyǵarmalar áli az. Otan qorǵaýshy degen mamandyqtyń qadir-qasıtetin arttyrýda buqaralyq aqparat quraldarynyń róli óte zor. Tek osy múmkindik óz deńgeıinde paıdalanylyp jatqan joq. Jastarǵa ómiri men ónegeli isterimen úlgi bola alatyn azamat, qaıratker, tulǵa aramyzda az emes. Tek olardyń esimin eldiń bári birdeı bile bermeıdi, deıdi ol.
