Borıs Djonson Ulybrıtanııanyń jańa premer-mınıstri atandy
NUR-SULTAN – LONDON. QazAqparat – Borıs Djonson Ulybrıtanııanyń premer-mınıstri atandy. Ol Ulybrıtanııanyń Konservatıvtik partııa jetekshisin saılaýda jeńiske jetti, dep habarlaıdy «QazAqparat» HAA The Guardian-ǵa silteme jasap.
Londonnyń burynǵy meri negizgi qarsylasy Djeremı Hanttan oza túsip, Konservatıvtik partııanyń qatardaǵy músheleriniń 92 153 daýysyn jınaǵan. Djeremı Hantqa partııanyń 46 656 múshesi daýys bergen. Saılaýǵa partııanyń 159 320 múshesiniń 87,4% qatysqan.
Borıs Djonson sársenbige deıin jumysyna resmı túrde kirise almaıdy. Tereza Meı korolevaǵa otstavka jóninde ótinish bildirmes buryn premer-mınıstr retinde Qaýymdar palatasynda sońǵy ret saýaldarǵa jaýap beretin bolady.
Keıin Borıs Djonson laýazymyn rastaý úshin Býkıngem saraıyna, artynan 10 nómirindegi tanymal qara esiktiń aldynda sóz sóıleýge Daýnıng-strıtke attanady.
Borıs Djonson ázirge qyzmetine kirisken joq, alaıda saılaýǵa qatysýynyń ózi brıtanııalyq bıliktiń negizgi músheleriniń arasynda qarsylyq týǵyzdy. Olar Londonnyń burynǵy merimen jumys istegennen góri jumystan ketýge nıetti ekenderin málim etti.
The Guardian aqparatyna sáıkes, olar Borıs Djonsonnyń Ulybrııatanııany Eýropalyq Odaqtan shyǵarý merzimin taǵy birshama ýaqytqa uzartpaı, 31 qazanǵa belgilegenine alańdaýly.
Tatıana Kýdrenok
