Bordıýrler nege aýystyryla beredi – Almaty ákimi jaýap berdi
Bostandyq aýdany turǵyndarynyń biri Almaty ákiminen «megapolıs kóshelerinde ornatylǵanyna kóp bolmaǵan, esh búlinbegen, jol jıegindegi bordıýrler nege qaıta aýystyrylyp jatqanyn» surady. Aıtýynsha, keıbir aýlalarda qalypty asfalt ta joq.
«Ókinishke oraı, qalada mundaı másele bar, asfalt tóselgennen keıin de ınjenerlik jelilerge qatysty qıyndyqtar týyndaıdy. Baıqasańyzdar, joldardaǵy jóndeý jumystary ınjenerlik jelilerge baılanysty. Ideal nusqa mynaý: barlyq kommýnıkatsııalardy jóndep, retke keltirý kerek, sodan keıin asfalt bir ret qana tóseledi. Buǵan deıin merdigerler gaz, sý qubyryn, kárizdi, elektr jelilerin transheıalaý jumystaryn sapasyz júrgizgen. Bıyldan bastap jelilerdi tóseý endi jolaqtyń barlyq eninen ótedi. Bul talapty qalalyq mobıldilik basqarmasy ázirledi. Bul tásil joldyń sapasyn saqtaýǵa kómektesedi. Kúrdeli jóndeý merzimin de eskerý qajet. Eger jol jóndeý merzimi kelmese, oǵan deıin bıýdjetten bul maqsatqa aqsha bólinbeıdi», - dep jaýap berdi ákim.
Erbolat Dosaev bordıýrler jaıaý júretin adamdardyń qaýipsizdigin qamtamasyz etetinin, sondyqtan olar jaqsy jaǵdaıda bolýy kerektigin aıtty.
«Qoǵamnyń, azamattardyń arqasynda jol jıegi máselesin baqylaýda ustap otyrmyn. Ótken aptada qazir jol jóndeýmen aınalysyp jatqan barlyq kompanııany jınadym. Barlyq qordalanǵan máseleni talqyladyq jáne olarǵa taǵy da eskerttim. Olardyń qalaı jumys isteıtinin qadaǵalap otyrmyz. Bordıýrlerdiń 3-5%-dan aspaıtyn bóligi ǵana aýystyrylady, qalǵandary túzetilip, ornyna qoıylady», - dep atap ótti Almaty ákimi.
Aıtýynsha, Almaty joldarynda bordıýrdiń tek eki túri bar.
«Birinshisi - tsement-qumdy jıektas. Ony áýeli prestep, keıin ornatady. Qysta joldardy hımııalyq zattarmen óńdeıtinimizdi eskersek, olardyń qyzmet etý merzimi bes jyldan aspaıdy. Ekinshi túri – 10 jyldan 15 jylǵa deıin qyzmet etetin granıt. Ál-Farabı dańǵylyndaǵy bordıýrdiń 20-25 paıyzyn aýystyramyz dep boljaǵan edik. Biraq 3%-yn ǵana aýystyratyn boldyq», - dedi ákim.
Eske salaıyq, bıyl megapolıste 200 shaqyrymnan asatyn 230 kóshe ortasha jóndeýden ótedi. Onyń ishinde negizgi magıstral – Abaı jáne ál-Farabı dańǵyldary bar.
