Bordıýr aýystyrǵysh ákimderge toqtaý bola ma – vıtse-mınıstr jaýaby
ASTANA. KAZINFORM – Ónerkásip jáne qurylys mınıstriniń orynbasary Qýandyq Qajkenov Úkimet otyrysynan keıin ótken baspasóz máslıhatynda bordıýr aýystyrǵysh ákimderge qashan toqtaý bolatynyn aıtty.
- Astananyń Nura aýdanynda jol jıegindegi bordıýrler men tas tósenishterdi aýystyryp jatyr. Halyq arasynda bul sybaılas jemqorlyqqa jol ashatyn tásildiń biri degen túsinik qalyptasqan. Osy bordıýr aýystyrǵysh ákimderge shekteý bola ma, - dep surady jýrnalıst.
Qýandyq Qajkenov bordıýr aýystyrýdyń normatıvi bolatynyn aıtty. Memleket buryn qurylys jumystaryna beriletin kepildik merzimin 2 jylmen shektep kelse, endi 5 jylǵa uzartpaqshy Aıtýynsha, bul da óz kezeginde bordıýr aýystyrǵysh ákimderge tyıym bolady
- Biz mınıstrlik atynan saıasatty belgileımiz. Saıasat boıynsha ár materıaldyń, ár qurylystyń jaramdylyq merzimi bar. Sonyń aıasynda jergilikti ákimdikter óz jumysyn isteıdi. Siz aıtqan bordıýrler men brýschatkalardy aýystyrýdyń óz merzimi bar. Qazir ákimdikter búkil qurylysty qaǵaz júzinde ǵana júrgizbeý úshin elektrondy júıeni engizip jatyrmyz. Zertteý aktisi, tehnıkalyq zertteý, bordıýrdiń eskirý kórsetkishi, tózimdilik qasıeti sııaqty málimetterdiń bári elektrondy júıege engiziledi.
Qurylys kompanııalarynyń naqty qandaı jumysty qandaı sapada oryndaǵanyn osy elektrondy júıeden qadaǵalaýǵa bolady. Qosymsha qadaǵalaý jumystaryn da eshkim qoldanystan shyǵarǵan joq, - dedi vıtse-mınıstr.
Aıta keteıik, búgingi Úkimet otyrysynda qurylys nysandaryna áýelgi jobasynan aýytqymaý úshin biregeı nómir beriletini aıtyldy.